कोरोना सै लड़े मा अब सेना कु सारा

देरादूण। प्रदेश मा खळाखळ फळणु कोरोना थैं काबू करणा खूंणि अब सरकार सेना क मदत ळींणिं क बारा मा सोव्चणिं च।

मुख्यमंत्री तीरथ सिंह रावतन ऐ बारा मा रक्षा मंत्री राजनाथ सिंह क दगड़ बात करण वळा छन।

खबर इन आणिं च कि प्रदेश मा खळाखळ (लगातार) कोरोना से हाळात बिगड़ना छन जै कारण से प्रदेश सरकार अब केन्द्र सरकार से मदत लिंणा क बारा मा विचार करणि च। उन्न त प्रधानमंत्री नरेन्द्र मोदी न मुख्यमंत्री थैं पैळिहि भरोसा दिय्यूँच कि केन्द्र सरकार कोरोना सै लडै़ मा पूरि तरौ मदत काराळी।

ऐ बारा मा कैबिनेट मंत्री हरक सिंह रावतन ब्वाळ कि मुख्यमंत्री कि ऐ बारा मा एकदा रक्षामंत्री दगड़ा बात ह्वैग्यायी। उन्न ब्वाळ कि आज एकदा राज्यपाळ दगड़ बात ह्वैळी तब जैकैकि दुबरा रक्षा मंत्री दगड़ बात करै जाळी।

डाॅ. हरक सिंह रावतन ब्वाळ कि प्रदेशक दसा रोजाना खराप हूंद जाणी च। कोरोना संक्रमण से म्वरण वळों क गिनती रोजाना बढ़दा ही जाणी च। हरक सिंह रावत बतै कि मुख्यमंत्री थैं प्रदेशक दसा बतै याळी अर मुख्यमंत्री न भी ऊंका सुझाव थैं गम्भीरता से ल्यायी। उन्न ब्वाळ कि जल्दी ही प्रदेश मा सेना भुंय्यां मा उत्रिकी क सर्या दारमदार (जिम्मेदारि) सम्भाळ सकदी।

खबर इन्न भि आणी च रक्षा मंत्री न ईं आपदा मा गढ़वाळ अर कुमौं पल्टन थैं लगौंणा क बात ब्वाळ।

बतै दै क प्रदेश मा संक्रमितों का गिन्ती रोजना बढ़नी च अर म्वरण वळा कि गिन्ती रोज 100 से जादा जाणी च। जै कारण से सरकार मा बरमंड मा झुराट (चिंता) क लैन साफ दिखेंणी च।