गढ़वाल कमिश्नर न चारधाम जातरा क सबि बन्दबस्त बगत मा पूरु करणा क निर्देश दीं

पौड़ी । गढ़वाल कमिश्नर सुशील कुमार न आज मुख्यायल पौड़ी मा विकास योजनौं क समीक्षा बैठक कायी।

ऐ मौका फर कमिश्नर न चारधाम जातरा थैं लेकैकि अधिकारियौं से तय्यरि क बारा मा जाणकारी ल्यें।
उन्न चारधाम जातरा क तयारि थैं लेकैकि अफसरू थैं बन्दबस्त पूरु करणा क निर्देश दीं।
समीक्षा बैठक मा 4 अफसरु क नी आण से नराज, कमिश्नर न ऊथैं बैठक मा नीं आणु क कारण बतौंणा खूंणि बोलि। उन्न सबि मण्डलीय अधिकारियौं थैं सखत निर्देश दीं अर बोलि कि जैमा बि अतिरिक्त प्रभार च, वु मंडल दफतर मा अपड़ि लगातार उपस्थिति दर्ज कर्यां।

गढ़वाल कमिश्नर न बोलि कि जातरा मा ध्वाड़ा अर खच्चरु क स्वास्थ्य जांच कर्यें ज्यां अर बिमार ध्वाड़ा अर खच्चरु थैं जतरा मा कतै नी जाण दियें ज्यां।

गढ़वाल कमिश्नर न बोलि कि ऐसु अंतर्राष्ट्रीय म्वाटु नाज कु साल मन्यें जाणु च इल्लै जातरा क बाटौं मा घर्या नाज क बण्यां चीजु थैं ब्यचणा कु साख तयारि कर्यें ज्यां। अर घर्यां नाज से बणि चीजु अर औरि उत्पादु थैं ब्यचणा खूंणि केन्द्र ख्वलें ज्यां, यांका दगड़ मा ऊंकु खुब प्रचार- प्रसार बि कर्यें ज्यां।