गंगोत्री धामा क द्वार ह्वैग्यी बन्द, अब ह्यूंद क मैनों मा माँ गंगा क पूजा पाठ मुखबा गंगा मंदिर मा ह्वैळी
उत्तरकाशी। मां गंगोत्री धामा क द्वार आज दिनमा 12 बजिक 01 मिनट मा विधि विधान क दगड़ मा बन्द ह्वैग्यी। यांक बाद माँ गंगा क डोलि गंगोत्री बटि मुखबा खूंणि रवाना ह्वैग्यें। मां गंगा क डोलि आज राति चंडी देवी मंदिर मा रुकळि। जै का बाद 27 अक्टूबर खूंणि माँ गंगा मुखबा मंदिर पर विराजमान ह्वैळी।
माँ गंगा क द्वार बन्द हूंण पैळि मां गंगोत्री धाम थैं फुळुळ सज्यें ग्यें छायीं। मां गंगा क द्वार बन्द हूंण सै पैळि माँ गंगा जी कु अभिषेका क दगड़ मा गंगा लहरी, गंगा सहस्त्रनाम पाठ कर्यें ग्यें। ऐ मौका फर गंगोत्री मंदिर मा भक्तोंन अखंड ज्योत क दर्शन बि करिन।
जै का बाद जम्मू कश्मीर लाइट इन्फैंट्री क बैंड अर ढोल दमाऊं क बीच माँ गंगा डोळि भैरों घाटी ह्वैकैकि चंडी देवी मंदिर पौंचळि, जख मां गंगा कु आज राति अराम ह्वाळु। जैका बाद भोळ भै दूजा क त्योवार पर मां गंगा अपड़ा मैत मुखबा पौंछलि। ह्यूंद क मैनों मा मां गंगा कु पूजा पाठ अब मुखबा गंगा मंदिर मा हि ह्वैळी।
ऐ मौका फर गंगोत्री विधायक सुरेश चौहान, गंगोत्री मंदिर समिति क रावल हरीश सेमवाल, सचिव सुरेश सेमवाल, अर बौत बड़ी संख्या मा तीर्थ पुरोहित अर लोग छायी।