कमै से जादा जैदाद क मामलु, गणेश जोशीक बढ़ि सकदन दिक्कत

देरादूण। उत्तराखण्डा कृषि मंत्री गणेश जोशी की कमै से जादा जैदाद क मामला मा दिक्कत बढ़ि सकदन। विजिलेंसन मंत्रीक खिलाप मुकदमा दर्ज करणा खुणि कैबिनेट बिटि मंजूरि मांगी। जै खुणि विशेष न्यायाधीश सतर्कतान धामी कैबिनेट तैं 8 अक्टूबर तक मंत्री क खिलाप मुकदमा दर्ज मामला म फैसला लिंणा का निर्देश दींन।

बतै दियां की आरटीआई एक्टिविस्ट एडवोकेट विकेश नेगी न कैबिनेट मंत्री गणेश जोशी पर 2022 विधानसभा चुनौम एक हलफनामा क अधार पर शिकैत कै छायीं। जैमा गणेश जोशी पर कमै से जादा जैदाद हूंणा कु आरोप लगै छायीं। यांकी शिकैत विजिलेंस से ह्वे। विजिलेंस कोर्टन भ्रष्टाचार से जुड्यां ये मामला क सुणें खुणि 19 अक्टूबर तय कायी। कोर्ट तैं अब ऐ मामला मंत्री परिषदा फैसला कु इंतजार च।

आठ जुलै 2024 क चिट्ठी कार्मिक अर सतर्कता विभागा तरफि बिटि विजिलेंस तैं भ्यजे ग्यायी। यीं चिट्ठी म सचिव मंत्री परिषद (गोपन विभाग) तैं शिकैत जांच अपणा स्तर पर कैकि कारवै करणा खुणि ब्वलें ग्यायी। कोर्ट न बोलिकि भारतीय संविधानानुसार मंत्री परिषद कार्यपालिका क फैसला लिंणा खुणि सर्वोच्च संस्था च।

कोर्टम भ्रष्टाचार निवारण अधिनियम क नियमम इन्ना मामलों मा मुकदमा दर्ज करणा आदेश से पैलि कैबिनेटा फैसला कु तीन मैना तक जग्वाल करै जान्द। चिट्ठी सात जुलै खुणि भ्यजे ग्यायी। जैकु तीन मैना कु बगत आठ अक्टूबर खुणि खतम हूंणू च। जैका बाद हि ये मामला म फैसला लिये जालु। अब कोर्टन ऐ मामला 19 अक्टूबरा तारिख तय करी च।