गणेश गोदियालन मुख्यमंत्री से मिलिकि अर अप्फ पर लग्यां आरोपु के जांच करणा क कायी मांग

देरादूण। उत्तराखण्ड कांग्रेसक पैल्यक अध्यक्ष गणेश गोदियालन मुख्यमंत्री धामी से मिलण क बाद एक ज्ञापन दे।

बतैं दियां के गणेश गोदियाल फर बदरी-केदारनाथ मंदिर समिति क सदस्य आशुतोष डिमरी न घपला करणा क आरोप लग्यां छन। यू आरोपु के जांचक मांग करणा खूंणि आज गणेश गोदियालन मुख्यमंत्री धामीन से मिलिकि हाईकोर्ट क रिटायर जज से जांच करणा के मांग कायी।

गणेश गोदियालन बोलि कि साल 2012 से 2017 क बीच मा बदरी-केदारनाथ मंदिर समिति क अध्यक्ष छायीं। वै बगत मा उ फर मंदिर समिति मा घपला करणा अ आरोप लग्यां छन। उन्न बोलि कि यांकि शकैत विभागक मंत्री सतपाल महाराज से नि कैकि उंका राजनीतिक विरोधि कैबिनेट मंत्री धन सिंह रावत से कर्यें ग्यायी। जैका बाद कैबिनेट मंत्री धन सिंह रावतन मंदिर समिति के सदस्य क शिकैत पर झट जांच करणा क आदेश दे दीं।

गणेश गोदियालन बोलि कि मि उत्तराखण्ड राज्य क सहकारिता विभाग, चिकित्सा अर स्वास्थ्य विभाग, उच्च शिक्षा मा हूयां घपलों थैं सब्यौंक समणि ल्यौं अर जांच करणा क मांग कायीं। लेकिन आज तक या पर कुई कर्वै नि ह्वै। उन्न बोलि कि सार्वजनिक जिन्दगि अर राजनैतिक जिन्दगि मा लग्यां आरोपु पर द्वी तरौ मानक नि हूंण चैंद। इन्न मा शिकैत पर बिना भेदभाव क जांच हूंण चैंद। उन्न बोलि कि मि पर लग्यां आरोप अर धन सिंह रावत पर लग्यां आरोपु के निष्पक्ष जांच हूंण चैंद।