गैरसैंण थैं राजधानी बणौंण क मांग थैं लेकैकि यूकेडी न कायी सचिवालय कूच
देरादूण। रूड़ियों राजधानी गैरसैंण मा विधानसभा कु सत्र सुरु ह्वैग्यें। बजट सत्र सुरु हूंणि क दगड़ विपक्षान सरकार थैं घेय्रणा कु काम सुरु कै दे।
यूकेडी न आज गैरसैंण थैं राजधानी बणौंणा कु अर भर्ति घपरोळु क सीबीआई जांच करणा क मांग थैं लेकैकि देरादूण मा सचिवालय कूच कायी। यूकेडी क कार्यकर्ताओं न देरादूण क सड़िक्यों मा खूब घमाचूर कायी। यूकेडी क कार्यकर्ताओं तैं पुलिसन बैरिकेटिंग लगें कि सचिवालय से पैळि हि रोकि दे।
बैरिकेटिंग लगें कि रवक्ण से नाराज यूकेडी क कार्यकर्तौं न सड़कि मा धरना पर बैठिग्यीं अर सरकार के खिलाफ खूब नारा बाजी कायी। यूकेडी न बोलि सरकार थैं बिना झट गैरसैंण थैं राजधानी घोषित करण चैंद।
यूकेडी क अनुमप खत्री न बोलि बल राजधानी क नौ फर भाजपा अर कांग्रेस द्विया पार्टियों न प्रदेसा क रैवासियों क दगड़ ध्वका कायी। उन्न बोलि अबि प्रदेस मा भाजपा क सरकार च इन्न मा भाजपा थैं बिना देर कर्यां गैरसैंण थैं प्रदेसा राजधानी घोषित करण चैंद।
उन्न बोलि कि जब तक सरकार गैरसैंण थैं राजधानी घोषित नी करदि, तब तक यूकेडी सड़िक्यौं मा आन्दोलन करणि राली।