प्रदेसा स्वास्थ्य क्षेत्र मा 182 करोड़ रुप्यौं क चार परियोजनौं कु ह्वै शिलान्यास

देरादूण। केन्द्रीय स्वास्थ्य मंत्री डॉ. मनसुख मांडविया अर मुख्यमंत्री धामी न आज सुक्बार खूंणि उत्तराखण्ड मा स्वास्थ्य 182 करोड़ रुप्यौं क चार परियोजनौं कु शिलान्यास कायी। जैमा 124 करोड़ रुप्यौं से बणण वळु दून मेडिकल कॉलेज मा 500 बिस्तरौं कु नै ब्लाक, रुद्रप्रयाग मा 20.38 करोड़ रुप्यौं से बणण वळु क्रिटिकल केयर ब्लॉक अर हल्द्वानी मा 19.48 करोड़ रुप्यौं कु क्रिटिकल केयर ब्लॉक बणौंणा कु काम सामिल च। मुख्यमंत्री आवास मा उर्यूं ऐ कार्यक्रम मा केन्द्रीय स्वास्थ्य मंत्री डॉ. मनसुख मांडविया जोशीमठ बटि वर्चुअल भाग ल्यायी।

केन्द्रीय स्वास्थ्य मंत्री न बोलि बल आज प्रदेसा मा 180 करोड़ से जादा कामु क शिलान्यास ह्वै। उन्न बोलि उत्तराखण्ड विकासा दौड़ मा खळाखळ अगनै बढ़णु च। उन्न बोलि कि अगर प्रदेस सरकार केन्द्र सरकारा दियां लक्ष्य थैं पूरु करदि त प्रदेस सरकार थैं पैसौं क क्वीं कमी नी ह्वैळी यांकी कोसिस करें जाली।
उन्न बोलि बल ब्याली बटि उत्तराखण्ड मा छौ, नीति अर मलारी गौ मा घुमण अर गौ का रैवासियौं क दगड़ मा बात करण कु मौका मिलि। मलारी गौ मा हेल्थ एण्ड वेलनेस सेंटर क कम्यूनिटी हेल्थ अफसरन बतै कि यख क्वीं बडु अस्पताल नी च, यांक बाद बि यख बड़ा डॉक्टर क सुविधा मिलणि च।

मुख्यमंत्री न बोलि कि प्रधानमंत्री क दिखयां बाटौं मा चलिकि प्रदेस मा चार काम करणा नीति बण्यें जाणि च। जै मा पैळि नीति च बीमारि थैं रवक्णा खूंणि जन जागरुकता । दूसर नीति गरीबु थैं सस्तु अर अच्छु इलाज। तिसर नीति च हेल्थ इंफ्रास्ट्रक्चर अर हेल्थ केयर प्रोफेशनल्स क क्वान्टिटी अर क्वालिटी मा बढ़ौतरी करणु। चौथी नीति च समस्याऔं कु समाधान झटाझट करणु। उन्न बोलि कि आज सर्या दुन्या कु हेल्थ सेक्टर कु भारत पर भरोसु बौत जादा ह्वैग्यें।

ऐ मौका फर कैबिनेट मंत्री गणेश जोशी, सांसद माला राज्यलक्ष्मी शाह, राज्यसभा सांसद नरेश बंसल, विधायक खजान दास, विनोद चमोली, प्रदीप बत्रा, सरिता आर्य, रेनू बिष्ट, मेयर सुनील उनियाल गामा, संयुक्त सचिव स्वास्थ्य, भारत सरकार विशाल चौहान, सचिव स्वास्थ्य डॉ. आर. राजेश कुमार अर स्वास्थ्य विभागा अधिकारी छायीं।