पूर्व भाजपा विधायक मालचंद दुबरा भाजपा मा आणा खूंणि छन त्यार

देरादूण। राजनीति भि क्या-क्या खेळ खिलांद। कभि खुट्टा मत्थीं त कभि मुण्ड निस्सु ह्वै जादा।
जी हां हम बात करणा छौ पुरोळा क पूर्व भाजपा विधायक माल चन्द जी कु। अभि कुछ दिन पैळि हि मालचन्द्र भाजपा थैं छोड़िक क्रांग्रेस पार्टी मा चळिग्यें छायी। अब खबर या आणि च कि मालचन्द थैं भाजपा ळ टिकट देंणा कु भरोसु दीं याळी , जै कारण से मालचन्द भाजपा मा दुबरा आणा खूंणि त्यार छन।

2017 क चुनौ मा भाजपा ळ मालचन्द थैं पुरोळा बटि टिकट दे छायीं। तब कांग्रेसक राजकुमारळ उथैं हर्रै द्यायी। जैका बाद भाजपा न राजकुमार थैं अपड़ा पाळा मा खिचि द्यायी त मालचंद थैं उन्न लगण बैट्ठि ग्यायी कि अब भाजपा मा मि खूंणि जगा नि च अर राजकुमार क भाजपा मा आणा से मिथैं 2022 मा टिकट मिलणु क सवाळ हि नि च। ऐ कारण सै मालचन्द ळ कांग्रेस पार्टी मा अपड़ि सियासी जमीन ख्वजणा क कोशिश कायी अर कांग्रेस पार्टी मा सामिळ ह्वै ग्यीं। ब्वळै जाणा च कि मालचन्द थैं काग्रेंस पुरोळा बटि टिकट दिंणा खूंणि त्यार च। काग्रेंस न अब्बि टिकट फाइनळ भि नि कायी कि खबर इन्न आणि च कि मालचन्द दूबरा भाजपा मा जाणा छन।