खाद्य सुरक्षा विभागन घ्यूं बणौंण वलि कम्पनिम मारि छापा

रुड़की। भगवानपुर हरद्वार जिलाम भोलेबाबा ऑरगेनिक प्राइवेट लिमिटेड कम्पनिम खाद्य सुरक्षा अधिकारियौं न छापामारी। टीम तैं घ्यूं बणद नीं मिलि। वखि ब्वलें जाणु च कि यु मामलु तिरूपति बाला जी मंदिरम लड्डु खुणि भ्यजे जाणु घ्यूं से जुड्यूं च।

बतैं जाणु च कि भोलेबाबा ऑरगेनिक डेयरी मिल्क प्राइवेट लिमिटेड कम्पनी बिटि बण्यूं घ्यूं तिरूपति बाला जी मंदिर खुणि भ्यजे जाणु छायीं।

खबर च कि आंध्र प्रदेसा वाणिज्य कर विभागा तरफि बिटि हूंणि छाळछांट मा बौत बडु घपरोल समणि ऐ। ऐ बारम आंध्र प्रदेस सरकारन उत्तराखण्ड सरकारक अधिकारियौं दगड़ि बात कायी। बतै जाणु च जुन अर जुलै कु मैना मा कम्पनी कु बण्यूं घ्यूं तिरूपति बाला जी मंदिर भ्यजें ग्ये छायीं।

खाद्य सुरक्षा विभागा एक दलन छापा मारि। दल तैं कम्पनी कु क्वीं कर्मचारी अर अधिकारी मौका पर नीं मिलि। यख घ्यूं नी मिलि, इतगै हि ना यख घ्यूं बणणा कु बि क्वीं काम नीं हूंणू छायीं। बस यख घ्यूं का डब्बौं पर चिपकण वलि नामचिप्पी (लेबल) हि छायीं।

खाद्य सुरक्षा अधिकारी न बतै कि शकैत मिलि छायीं कि यीं कम्पनी मा जु घ्यूं बणणु च वैमा मिलावट करे जाणि च। उन्न बोलि जब खाद्य सुरक्षा दल वख पौंछि त वख घ्यूं बणदु नीं मिलि। वख काम करण वला कर्मचारिन बतै कि एक मैना बिटि यख क्वीं बि घ्यूं नी बणि। खाद्य सुरक्षा अधिकारी न बोलि कि कारखाना क मालिकन मौका फर औंण से मना कै दे। उन्न बोलि केन्द्रीय जांच दल ऐ मामला म जांच करणु च अर हम अपणि रिपोर्ट बणै कि केन्द्रीय दल तैं भेजि द्यूला। कम्पनिक मालिक तैं सूचना जारी करे ग्यायी।