क्यू आर कोड कु खेल, आस्था कु मखौल नीं त क्या च?

भगवान केदारनाथ अर भगवान बदरीनाथ क मंदिर मा क्वीं क्यू आर कोड लग्यें कि चलिग्यें अर मंदिर समिति तैं यांकि खबर तक नीं लगि। या मंदिर समिति क नकामी नीं त क्या च। भगवान केदानाथ अर भगवान बदरीनाथ क पाट खुलण क दिन मा हि यीं क्यूआर कोड लग्यें ग्यीन, वु ब्वन च मंदिर समिति के अध्यक्ष अजेन्द्र अजय कु। अब या मा या स्वचण वलि बात च कि कैथैं बि यु पता नी चलि कि मंदिर क समिणि क्वीं क्यु आर कोड लग्यें कि चलिग्यें। सोशल मीडिया मा जब या खबर चलि त मंदिर समिति न क्यू आर कोड हट्यें दे अर पुलिस मा शिकैत कैकि जांच करण खूंणि बोलि।

अजेन्द्र अजय ब्वना छन कि मंदिर ख्वलणा क दिन हि यीं क्यू आर कोड मंदिर मा लग्यें ग्यीं अर यु क्यू आर कोड कु मंदिर समिति क दगड़ मा क्वीं मतबल नीं च अर बीकेटीसी अज्यूं तक पेटीएम कु इस्तमाल नीं करणि च। इन्न मा बडु़ सवाल ही यों च कि आखिर मंदिर समिति क जाणकारी क बिना मंदिर क अगनै क्यू आर कोड कैन लग्यें अर मंदिर समिति अबि तक कख सियीं (सोया) छायीं। सिरफ पुलिस मा शिकैत दर्ज कैकि मंदिर समिति अपड़ि जिम्मेबरि से बची नी सकदि।

वखि ये मामळा मा नै मोड़ तब ऐग्यें जब क्यू आर कोड तैं स्कैन करणा फर पैंसा बदरी केदार मंदिर समिति क खाता मा जाणा छन, इन्न क्यू आर कोड बतौंणु च। अब इन्न मा बडु सवाल यौं च कि क्या बदरी केदार मंदिर समिति क द्वी एकाउंट छन या फिर मंदिर समिति क अध्यक्ष जांच करणा बात बोलि कि कुछ गुंजमुंज करणा छन। मामला बौत जादा गम्भीर च, मंदिर समिति के आंख्यिौं क समिणि आस्था क नौ पर मखौल ह्वैग्यें अर मंदिर समिति तैं खबर बि नीं ह्वैं।

जन्नि या बात बढ़दि ग्यें, उनि नै-नै बात समणि आणि रै, अब द्वी दिन बाद या बात समणि आणि च कि जै क्यू आर कोड थैं लेकैकि समिति न पुलिस मा शिकैत दर्ज कै छायीं, वै फर अब मंदिर समिति क ब्वनु च कि वु क्यू आर कोड मंदिर समिति कु ही च। त सवाल यौं कि आखिर एक समिति क द्वी बैंक एकाउण्ट कन्नै कै कि ह्वै सकदन। सवाल त यौं बि च कि मंदिर समिति क द्वी पेन नम्बर कन कैकि ह्वै सकदन, किलैकि क्यू आर कोड से जुड्यूं पैन नम्बर अर मंदिर समिति कु खातु से जुड्यूं पैन नम्बर द्विया अलग-अलग छन।

बदरीनाथ केदारनाथ मंदिर समिति की अधिकृत वेबसाइट मा जु बैंक खाता च वैं मा पैन नम्बर AAETS8361E अर मंदिर मा लग्यूं क्यू आर कु खाता मा पैन नम्बर AAAGU0772Q से जुड़्यू च। पैन नम्बर AAAGU0772Q देव स्थानम बोर्ड क नौ फर च। जबकि देवस्थानम बोर्ड खतम ह्वैग्यें। बड़ी बात या च कि देवस्थानाम बोर्ड क पैन अर जीएसटी द्विया नम्बर आज भि चलणा छन। यु आयकर कानुना कु उल्लंघन नी त क्या च?

जन्नि रिपोर्ट दर्ज ह्वै यु मामळु समणि ऐग्यें अर मंदिर समिति चौतर्फा घिरेग्यें। मंदिर समिति फर चौछ्ड़ि सवाळु हूंणा छन। मंदिर समिति तैं दियें जाण वळु दान पर सवाल खड़ा हूंणा छन।

इन्न मा साफ च कि क्वीं बड़ु घपरोल च। मंदिर समिति सिरफ अर सिरफ पुलिस मा शिकैत कै कि अपड़ि जिम्मेबरि से नीं बच सकदि। सच समणि आण चैंद, मामला मा जांच हूंण चैंद किलैकि यु भक्तु क आस्था अर भावनौं कु मखौल हि ना बल बाबा केदार अर भगवान बदरी विशाल क् गरिमा कु ठट्टा लगाणा कु काम बि च।