25 साल ह्वेग्येन पर आज बि लोगु सड़क, स्वास्थ्य, शिक्षा अर रूजगार वास्ता भटकणा छनः यूकेडी

प्रदेसा रुड़ियों की राजधानी गैरसैंण म आज विधानसभा कु मानसून सत्र उर्ये ग्यायी। मानसून सत्रा पंचैत चुनौ मा हूयीं घपरोळ अर प्रदेसा कानून बन्दुबस्त तैं लेकैकि खुब हंगामा ह्वे। जैका बाद सदना कारवै तैं बार-बार रवक्णा प्वोड़ि।

त वखि दूसर तरफां विधानसभा से भैर भराड़ी सैंणम उत्तराखण्ड क्रांतिदल न सरकारा खिलाप प्रदर्शन कायी। यूकेडी न भाजपा हअर कांग्रेस पर आरोप लगै अर बोलि यु द्वियौं उत्तराखण्ड मूल भावना तरफां बिटि आंखा बुझि दींन। इल्लै प्रदेस रैवासियों तैं इन्नु लगणु च कि यु द्विया दलु न हमतैं ठगै याली।

यूकेडी बृजमोहन सजवाण अर आशीष नेगी न बोलि गैरसैंण तैं प्रदेस राजधनी बणौंणा वास्ता कबि यु दलु की इच्छा नीं रायी। उन्न बोलि गैरसैंण राजधानी उत्तराखण्ड आंदोलन मूल मांग छायीं जु अबि तक नीं ह्वे।
उन्न बोल कि उत्तराखण्ड बण्यां 25 साल ह्वेग्येन पर आज बि लोगु सड़क, स्वास्थ्य, शिक्षा अर रूजगार वास्ता भटकणा छन।

यूकेडी क नेताओं बोलि कि पाड़ मठ, मंदिर, बोणअर जमीन तैं बचौंण वास्ता यूकेडी जु बि होलु, वैतैं कारली।