ऋषिकेश मा राजकीय सम्मान से ह्वै पर्यावरणविद सुन्दरळाळ बहुगुणा कु अन्तिम संस्कार
ऋषिकेशः पर्यावरणविद सुंदरळाल बहुगुणा कु आज ऋषिकेश में निधन ह्वै ग्ये। पर्यावरणविद सुंदरळाल बहुगुणा निधन क खबर सूंणदा सर्या प्रदेश मा दुःखक लैर दौड़ि ग्यायी।
Passing away of Shri Sunderlal Bahuguna Ji is a monumental loss for our nation. He manifested our centuries old ethos of living in harmony with nature. His simplicity and spirit of compassion will never be forgotten. My thoughts are with his family and many admirers. Om Shanti.
— Narendra Modi (@narendramodi) May 21, 2021
प्रधानमंत्री नरेन्द्र मोदीळ पर्यावरणविद सुन्दाळाळ बहुगुणा का म्वरण पर दुःख जत्तै। प्रधानमंत्रीळ ट्वीट करैकि ब्वाळ कि सुंदरळाळ बहुगुणा क ईं दुन्या बटि जाणू देस खूंणि बौत बडु़ नुकसान च। उन्न ब्वाळ कि बहुगुणा जी कु सिद्दु पना अर दया क भावना थैं कबि भि भुल्यें नि जै सकदु। म्यारा विचार उंका म्वसा अर उंका चाण वळों का दगड़ मा छन।
राज्यपाळ बेबी रानी मौर्य न पर्यावरणविद अर स्वतंत्रता संग्राम सेनानी अर चिपको आन्दोळन क नायक सुन्दरळाल बहुगुणा का म्वरण पर दुःख जतै। राज्यपाळन ब्वाळ कि बहुगुणा क म्वरण सर्या देस अर दुन्या खुंणि नुकसान च। उन्न ब्वाळ कि वृक्षमित्र सुंदरळाळ बहुगुणाळ पाणी, बणौं अर माटु थैं अपड़ा जीवन कु आधार बणयुं छायी। उन्न अपणु सर्या जींदगी पर्यावरण थैं देंय्यीं छायी। उंका जीवन अर सिद्धान्त पर्यावरण क रक्षा करणा वळौं थैं सदनि यादा राळा अर प्ररेणा द्याळा।
मुख्यमंत्री तीरथ सिंह रावतन ब्वाळ कि पद्मविभूषण सुंदरळाळ बहुगुणा क जाण से प्रदेश हि न देस खूंणि भि नुकसान ह्वै। उन्न ब्वाळ कि समाज अर पर्यावरण क क्षेत्र मा उंकि कमि थैं हम कभि पूरू नि कैरि सकदो।
सुंदरळाळ बहुगुणा न 1972 मा चिपको आन्दोळन थै धार द्यायी। उन्न देस अर दुन्या मा बणौं थैं बचाणा कंु रैबार द्यायी। जै कारण से चिपको आन्दोळन क आवाज सर्या दुन्या न सूणैं। बहुगुणा जी थैं गदनों (नदी), बणौं से बौत ळगाव छायी, यूउ्थैं उ सबसे बड़ु धन मनदा छायी। ईं कारण छायी बहुगुणा जी बिजळी बणौंणा खूंणि छ्वटी -छ्वटी परियोजनाओं क बात करदा छायी। ईं कारण छायी कि उ टिहरी बांध जन्नि बड़ि परियोजना क पक्ष मा कबि नि रायी।
बहुगुणा जी कुछ दिन पैळि बटि कोरोना से पीड़ित छायी अर उंकी इळाज अखिळ भारतीय आयुर्विज्ञान संस्थान ऋषिकेश मा चळणु छायी। आज उंकू ऋषिकेश में निधन ह्वै ग्ये।
कोविड नियमों थैं ध्यान मा धैरिक राजकीय सम्मान क दगड़ उंकू अन्तिम संस्कार ऋषिकेश का पूर्णानन्द घाट मा करै ग्यायी। उंका नौनु राजीव नयन बहुगुणा न पीपीई किट पैनिक उथैं आग द्यायी।
पर्यावरणविद सुन्दळाळ बहुगुणा थैं विधानसभा अध्यक्ष प्रेमचंद अग्रवाल, जिलाधिकारी देहरादून डॉ. आशीष श्रीवास्तव, मेयर अनीता ममगाई, एसएसपी योगेंद्र सिंह, एसपी देहात स्वतंत्र कुमार, पर्यावरणविद अनिल जोशी, मलेथा आंदोलनकारी समीर रतूड़ी, एसडीएम वरुण चैधरी न श्रद्धांजळि द्यायी।