सेवानिवृत्ति पर अपर निदेशक आशारानी पैन्यूली तैं दिये ग्यायी भावुक विदै
अपर निदेशक आशारानी पैन्यूलिक सेवानिवृत्ति पर एससीईआरटी उत्तराखण्डन ऊतैं भव्य विदै समारोह उर्ये की सम्मानित कायी।
विदै समारोह कु कार्यक्रम एससीईआरटी सभागार मा उर्यें ग्यायी, जख महानिदेशक विद्यालयी शिक्षा झरना कमठानन आशारानी पैन्यूली क कामु क खुब तरिफ कायी अर बोलि कि ऊंकी नेतृत्व क्षमता अर प्रबंधन कु मि सदनि सम्मान करदु , उन्न शिक्षा विभागम अपणि सेवा से एक मिसाल कायम कायी।
निदेशक अकादमिक शोध एवं प्रशिक्षण बंदना गर्ब्यालन बोलि कि आशा रानी पैन्यूली ‘सदनि बगत पर फैसला लिंण वलि अर अपणु काम तैं कुशलता से पूरू करण वलि अधिकारी छायीं। ऊंका दगड़ि काम करणु सदनि प्रेरणादायक रायीं।’
वखि माध्यमिक शिक्षा निदेशक डॉ. एस.बी जोशी न बोलि हम द्विया दगड़िया का अधिकारी छौ। ऊंकु काम करणा कु तरीका अर अगनै बढ़िकि काम करणा क्षमता न विभागन खुब तरक्की कायी।
प्रारंभिक शिक्षा निदेशक रामकृष्ण उनियालन बोलि कि आशा रानी पैन्यूली क नेतृत्व क्षमता च, वु हमरा विभागा एक कटकुटु स्तंभ रैन। ऊंकी कार्य कुशलता अर समर्पण सदनि याद रालु।
संयुक्त निदेशक एससीईआरटी कंचन देवराड़ी न बोलि कि आशा जी क दगड़ि बितयूं बगत अर ऊंकी काम करणा तरीकौं तैं सदिन याद रखळु। ऊंकी काम करणा तागत हम सब्यौं तैं प्रेरणा देलि।
कार्यक्रम मा अपर निदेशक आशा रानी पैन्यूली पर बणि एक डॉक्यूमेंट्री फिलम बि दिख्ये ग्यायी। जैमा आशा रानी पैन्यूली कु छ्वटा बिटि सेवानिवृत्ति हूंण तक कु सफर तैं दिख्ये ग्यायी।
अपर निदेशक एससीईआरटी आशा रानी पैन्यूली न बोलि कि मि अब डीएन संस्था क दगड़ि निदेशक कु पद पर काम करणि वलि छौ। उन्न बोलि कि एससीईआरटी म क्वीं पार्क या गेट बणद त मि यां का वास्ता अपुण योगदान दिंणा खुणि सदनि त्यार छौ।
ऐ मौका पर आशा रानी पैन्यूली क द्विया नौंना-ब्वारी, नाती-नतिणा बि छायीं। ऊंका बड़ा नौंना न बोलि कि मेरी ब्वे (माँ) न सदनि हमतैं अगनै बढ़णा खुणि प्रेरित कायी। हमन ऊंकी मेनत अर समर्पण से बौत कुछ सीखी, अब बगत ऐग्ये कि वु हमरि दगड़ि बगत बितैयां। वखि ऊंका बुबाजी न बोलि कि ‘आशा मेरू राजा बेटा च’, वींकी ऐ सफलता पर मितैं बौत गर्व च।
अपर निदेशक आशा रानी पैन्यूली कु सेवानिवृत्ति समारोह तैं समलौण वास्ता एक सांस्कृतिक कार्यक्रम बि उर्यें ग्यायी।
अपर निदेशक आशारानी पैन्यूलिक सेवानिवृत्ति विदै समारोह कार्यक्रम मा एससीईआरटी अर उत्तराखण्ड शिक्षा विभागा अधिकारी, कर्मचारी अर शिक्षक सामिल ह्वेन।