प्रधानमंत्रिन मुख्यमंत्री धामी अर आपदा पीड़ितु दगड़ि कायी मुखाभेंट अर आपदा तोक वास्ता 1200 करोड़ रुप्यौं की घोषणा कायी

प्रधानमंत्री तैं आज उत्तरकाशी, चमोली, टिरी अर पौड़ी गढ़वाल कु आपदा क्षेत्र कु ह्वै दौरा करणु छायीं
यांका वास्ता प्रधानमंत्री नरेन्द्र मोदी देरादूण जौलीग्रांट ह्वै अड्डा पौंछिन पर मौसम खराब हूंणा कारण उन्न अपणु ह्वै सर्वेक्षणु कु दौरा रद्द कै द्यायी।

यांका बाद प्रधानमंत्रिन जौलीग्रांट एयरपोर्ट गेस्ट हाउस मा मुख्यमंत्री दगड़ि मुखाभेंट कायी अर आपदा तोकम हूंया नुकसानक् बारम जाणकारी ल्यायी।

प्रधानमंत्री आपदा प्रभावित लोगु दगड़ि बि मुखाभेंट कायी। ऐ मौका पर प्रधानमंत्रिन आपदा पीड़ितु दगड़ि छ्वीं लगै अर ऊंकी दिक्कत अर आपदा प्रभावित तोका बारम जाणकारी ल्यायी। प्रधानमंत्री आपदा पीड़ितु तैं मदत कु भरोसु द्यायी।

बतै दियां ऐसु पैलि 5 अगस्त खुणि खीरगंगा गाड़ धराली उत्तरकाशी म आपदा ऐ छायीं।

6 अगस्त खुणि सैंजी गौं पट्टी-बाली कण्डारस्यूं अर रैदुल गौं पट्टी-पैडुलस्यूं मा जादा बरखा हूंणा कारण आपदा ऐ छायीं।

यांका बाद 23 अगस्त खुणि थराली चमोली म आपदा ऐ छायीं। जख कोटड़ीप, राड़ीबगड़, अपर बजार कुलसारी, चेपडो, सगवाड़ा मा आपदक कारण बौत नुकसान ह्वे।

ऐसु प्रदेसम आपदा कारण बौत नुकसान ह्वे। आपदम हूंया नुकसान वास्ता प्रदेस सरकारन केन्द्र सरकार बिटि 5702 करोड रुप्यौं की मदत मांगि। जैका बाद भारत सरकारै एक टीम न प्रदेसम आपदा से हूंया नुकसान कु सर्वे कायी। अर अब प्रधानमंत्री आपदा से हूंया नुकसाना बारम मुख्यमंत्री से जाणकारी ल्यायी।

आपदा से प्रदेसम हूयां नुकसान जाणकारी समीक्षा करणा बाद प्रधानमंत्रिन आपदा तोक वास्ता 1200 करोड़ रुप्यौं की घोषणा कायी।

प्रधानमंत्रिन आपदम म्वरण वलों की कुटुम्दरि तैं 2 लाख अर घैल लोगु तैं 50 हजार रुप्या देंणा घोषणा कायी।
प्रधामंत्रिन आपदम अनाथ हूयां बच्चौं का वास्ता पीएम केयर्स फॉर चिल्ड्रन योजनाक जरिया मदत करण की बि घोषणा कायी।

प्रधानमंत्री प्रदेस सरकार तैं भरोसु द्यायी कि आपदा यीं घड़िम सर्या देस उत्तराखण्डा दगड़ि खडु च।