गळत काम कु ठिकरु मुण्डम् अर सुपिना दय्खणा छन माननीय बणणा का

UK Dinmaan

लोकसभा क तीन चरण कु चुनौ खतम ह्वेग्ये अर अब चौथु चरणा बारी च। पर चौथु चरण म बि इन्ना-इन्ना प्रत्याशी चुनौ क मैदान मा छन जौ कु मुण्ड मा कतल, दुराचार, ब्यटुला पर जुलम जना गळत काम करण इलजाम छन। इन्ना इलजामा बाद बि यीं उमेदवार सांसद बणणा कु सुपिना दय्खणा छन। इन्न क्वीं न बल ऐसोसिएशन फॉर डेमोक्रेटिक रिफॉर्म्स क रिपोर्ट बतौंणि च।

चौथु चरण मा 360 उमेदवार माननीय बणाकु सुपिन दय्खणा छन। ऐसोसिएशन फॉर डेमोक्रेटिक रिफॉर्म्स क रिपोर्ट बतौंणि च 274 उमेदवारु पर बौत गंभीर इलजाम छन। कुल 50 उमेदवार पर ब्यटुलों पर अत्याचारा मामला छन, पंाच पर बलात्कार अर 11 पर कतल कु आरोप छन।

चौथु चरण मा 10 प्रदेसु क 97 लोकसभा तोक म चुनौ हूणि। यु सबि 97 सीटु मा कुल 1717 उमेदवार अपणु जोग (भाग्य) तैं अजमौंणा छन। ऐसोसिएशन फॉर डेमोक्रेटिक रिफॉर्म्स क रिपोर्ट बतौंणि च चौथु चरण मा 21 प्रतिशत उमेदवार मतलब 360 उमेदवारु पर अपराधिक मामला छन। कुल 16 प्रतिशत उमेदवार जैमा 274 उमेदवार इन्न छन जौ फर बौत गंभीर आरोप छन। यु मा 17 उमेदवार इन्न छन जौ पर कै मामलु मा अरोप बि सिद्ध बि ह्वेग्येन।

कुल 11 प्रत्याशी इन्न छन जैका खिलाप भारतीय दंड संहिता क धारा 302 क् कतला मामला दर्ज छन अर 30 उमेदवारु पर भारतीय दंड संहिता क् धारा 307 कतल क कोसिस करणा मामला दर्ज छन। 50 उमेदवार इन्न छन जौ फर ब्यटुलों दगड़ दुराचार अर जुलम करणा मामला दर्ज छन। चुनौ लड़ण वला 44 उमेदवार इन्न छन जौ पर भाषण देकैकि लोगु तैं भड़कौंणा मामलु दर्ज च।

आपराधिक मामला वला उमेदवारु तैं उमेदवार बणौंणा म क्वीं बि दल पिछने नीं च। कांग्रेसा 61 उमेदवार छन। जैमा 35 कु खिलाप आपराधिक मामला दर्ज छन जैमा 22 इन्न छन जौ फर बौत गंभीर मामला छन। भाजपन 70 उमेदवार मैदान मा छन, जैमा 40 उमेदवारु क खिलाप अपराधिक मामला दर्ज छन। 32 इन्न छन जौ फर गंभीर अपराधिक मामला दर्ज छन। बीआरएस न 17 उमेदवार मैदान छन, जैमा दसा खिलाप अपराधिक मामला दर्ज छन। टीडीपी 17 उमेदवार म बिटि 9 पर अपराधिक मामला दर्ज छन अर 6 पर गंभीर आपराधिक मामल छन।

बीजेडी क द्वी उमेदवारु पर बौत गम्भीर मामला दर्ज छन। आरजेडी अर उद्धव वाला साहेब ठाकरे क शिवसेना क चार उमदेवारु बिटि द्वी पर अपराधिक मामला दर्ज छन। वाईएसआरसीपी क 12 म बिटि 9 उमेदवारु पर आपराधिक मामला दर्ज छन। समाजवादी पार्टी 19 उमेदवारु म बिटि 7 पर आपराधिक मामला दर्ज छन।