राष्ट्रपति जी यखि रै जावा, तुमर आणा से ‘दून स्मार्ट’ ह्वैग्यें
देरादूण। राष्ट्रपति द्रौपदी मुर्मू कु उत्तराखण्ड कु द्वी दिनकु दौरा खतम ह्वैग्यें। राष्ट्रपति न आज मसूरी अर देरादूण मा दून विश्वविद्यालया कु दीक्षांत समारोह मा भाग ल्यें।
राष्ट्रपति कु द्वी दिनकु दौरा मा न्यू कैण्ट रोड, राजपुर रोड, ईसी रोड, हरद्वार रोड, बाईपास अर दून विश्वविद्यालय रोड थैं वीवीआईपी रोड बण्यूं छायीं। राष्ट्रपति कु द्वी दिनकु दौरा मा सर्या शासन, प्रशासन अर देरादूण नगर निगम हत्थ खुट्टा फुल्यां छायीं कि कखि क्वीं कमी न रै ज्यां। सबि राष्ट्रपति क खातिरदारी मा लग्यां छायीं।
त दूसरि तरफौं राष्ट्रपति क द्वी दिनकु दौरा मा देरादूण आणा फर देरादूण क रैवासी बौत खुस छन अर ब्वना छन कि राष्ट्रपति जी तुम द्वी, तिन दिन बाद सदनि देरादूण मा आणा रैय्यां।
बात इन्न च कि देरादूण मा स्मार्ट सिटी क नौ फर जगा जगा काम हूंणा छन, जै स देरादूण मा सड़क्यिों का बुरा हाल हूंया छायीं। जगा-जगा सड़क्यिों मा खड़वळा प्वड़या छायीं, कखि सड़क्यिों माटु हि माटु हूय्यूं छायीं, इन्न मा हि राष्ट्रपति कु द्वी दिनकु दौरा ह्वै।
यु हि वु बडु कारण च देरादूण क रैवासी राष्ट्रपति क देरादूण मा औण से बड़ा खसु छन। दून विश्वविद्यालय रोड जु एक मैना बटि बौत खराब छै, वीं सड़कि मा सीवर लैन कु काम चलणु छायीं, जैक कारण वीं सड़क्यिों मा माटु हि माटु, अर जगा जगा खड़वळा हूयां छायीं। राष्ट्रपति औंणा से वा सड़क राति-राति मा नै बण्यें ग्यें। सड़क्यिों मा लटकणा डाळौं क भौंटों थैं भि कट्यें ग्यीं। सर्या देरादूणा मा सड़क्यिों क डिवाइडरु मा रंगें पुतै कु काम भि कर्यें ग्यें।
नगर निगमन जै-जै सड़क्यिों बटि राष्ट्रपति जाणु छायीं, वीं-वीं सड़क्यिों मा सफै अभियान चलें, सड़क्यिों क किनाराैं फर चूना डल्यें ग्यें, सड़क्यिों क किनारा धर्यां कुड़ा क डब्बौं थैं हट्यें ग्यें। सड़क्यिां मा हारु रंगा कु कपड़ा लग्यें कि देरादूण क कींच (गंदगी) थैं छिपौंणा कु काम भि कर्यें ग्यें।
देरादूणा क स्कूळुमा छुट्टी कर्यें ग्यें अर कखि स्कुळुमा 12 बजिक बाद छुट्टि कर्यें ग्यें। इतगे ना ईसी रोड मा स्मार्ट सिटी क नौं फर बण्यां स्पीड ब्रेकर थैंं भि उखाड़णा कु काम कर्यें ग्यें। आज सड़क्यिों मा गाड़ी कम पुलिस जादा छायीं।
आज देरादूण चमकार दय्खण लैक छै, जै थैं देखिक देरादूण क रैवासी ब्वना छन बल राष्ट्रपति जी तुम यखि रै जावा, तुम जख-जख सड़क्यिों बटि ग्यां, वख-वख ‘दून स्मार्ट’ ह्वैग्यें।