गौरीकुण्ड बटि पैदल केदारनाथ धाम मा पौंचिन डीएम

रुद्रप्रयाग: रुद्रप्रयाग मा खळाखळ (लगातार) प्वाड़णु ह्यूं क कारण पैदळ कु बाटु बन्द एखारि एखारि (बार बार) बन्द हूंण छायीं फर अब केदारनाथ क पैदल बाटु खुलिग्यें।

रस्ता खुलिण क बाद अब केदारनाथ जातरा क तय्यरि मा तेजी ह्वैग्यें। जातरा क तय्यरि दय्खण खूंणि डीएम मयूर दीक्षित न गौरीकुण्ड बटि केदारनाथ धाम तक पैदल निरीक्षण कायीं।
रुद्रप्रयाग पुलिसन 5 पुलिस थाणा, 9 पुलिस चौकी, 3 अस्थायी पुलिस चौकी जातरा मा बाटों मा ख्वलण तयारि कै याली।

केदारनाथ धाम कु पैदल बाटु मा ह्यूं थैं हटौंणा मा भुरत्यों (मजदूर) थैं द्वी मैना कु बगत लगिग्यें। पैलि मार्च क मैना मा धाम कु बाटों मा आण-जाणु सुरु ह्वै जान्दु छायीं पर अबक दा खळाखळ प्वाड़णु ह्यूं क कारण पैदल बाटु बार बार बन्द हूंण छायीं व वखि भैरव गदेरा अर कुबेर गदेरा मा ग्लेशियर टूटणा क कारण बाटु बन्द ह्वैग्यें छायीं। भुरत्यौं न 15 फीट से बड़ु ग्लेशियरौं थैं काटिक बाटु त्यार कै। पैदल बाटु खुलण क बाद अब जातरा से जुड्यां ळोग धाम मा जातरा क त्यारि खूंणि पौंचण बैठिग्येेंन।

रुद्रप्रयाग डीएम न पैदल बाटु मा जातरा क बन्दबस्त थैं देखि अर जातरा से जुड़यां विभाग अर अधिकारियों थैं काम बगत मा पूरु करणा क निर्देश दीं।