जिलाधिकारी देरादूणन लैनम खड़ु ह्वेकि ओपीडी कु परचा बणै

देरादूण। देरादूणा नै जिलाधिकारी सविन बंसल आज सुबेर 9.30 बजि जिला अस्पताल पौंछिन। वख उन्न आम मनखिक तरौं लैनम खडु ह्वेकि ओपीडी कु परचा बणै अर अस्पताल कु बन्दुबस्ता तैं देखि।

जनि अस्पताल प्रशासन तैं यीं बातिकि खबर ह्वे उन्न अस्पतालम भिवड़ाट मचिग्ये। जिलाधिकारी अस्पताल बन्दबस्त देखिकि मुख्य चिकित्साधिकारी अर प्रमुख चिकित्सा अधीक्षक तैं सब ठीक करणा क निर्देश दींन।

जिलाधिकारी अद्धा घण्टा तक आम आदमि तरौं अस्पताल मा धुमणा रै अर लोगु दगड़ि बात कैकि अस्पताला बन्दबस्त बारम जाणकारी लिंणा रै।
10 बजिकि सबि अधिकारी अस्पतालम पौंछिन। जैक बाद जिलाधिकारी पैलि साफ सफै तैं लेकैकि अपणि नराजगी जतै अर अस्पताल म सफै बन्दुबस्त ठीक करणा खुण अर साफ पीणा कु पाणि कु बन्दबस्त करणा निर्देश दींन।

जिलाधिकारी न बोलिकि अस्पतालम औंण वला तैं कन्नि बि दिक्कत नीं हूंण चैंद। उन्न अस्पतालम दवै की खिड़की बणौंणा खुणि बि बोलि।

जिलाधिकारी न अस्पताल म भर्ति बिमारू दगड़ि कु हाल-चाल पूछि। जिलाधिकारी अस्पताला कर्मचारियों दगड़ि बात कायी अर ऊंकी दिक्कता बारम बि पूछि।