दिनेश अग्रवालन बि भाजपा का ह्वेगीन

दून। कांग्रेसा बिटि द्वी बारा विधायक दिनेश अग्रवाल बि भाजपा क खुचिल मा बैठिग्येन। उत्तराखण्ड कांग्रेसा बड़ा नेता अर 2024 लोकसभा चुनौ का स्टार प्रचारक दिनेश अग्रवाल न आज भाजपा क सदस्यता ग्रहण कै याली। दिनेश अग्रवालन छंचर खूणि कांग्रेस पार्टीक सदस्यता बिटि इस्तीफा दे याली छायीं अर आज इत्वार खूणि उन्न भाजपा कु फूल थामी याली।

त वखि प्रदेश कांग्रेसन दिनेश अग्रवाल तैं पार्टी विरोधि छ्वीं लगौंण पर पार्टी क प्राथमिक सदस्यता से छः साल खूणि निकालि दे।

दिनेश अग्रवाल 1993 अर 1996 मा उत्तर प्रदेशा बगत देरादूण विधानसभा सीट पर चुनौ लड़िन अर हरबंश कपूर से हारि ग्यीन। उत्तराखण्ड बणणा बाद 2002 अर 2007 मा द्वी विधानसभा मा उन्न लक्ष्मण चौक सीट बिटि नित्यानंद स्वामी तैं हरै अर दुबरा भाजपा प्रकाश सुमन ध्यानी तैं हरै। यांका बाद 2017 विधानसभा मा धर्मपुर सीट मा भाजपा क विनोद चमोली न ऊतैं हरै। यांका बाद से ही दिनेश अग्रवाल सुस्त प्वड़यां छायीं अर पार्टी से नराज छायीं।

भाजपा दप्तर मा दिनेश अग्रवाल भाजपा प्रदेश अध्यक्ष महेंद्र भट्ट, कैबिनेट मंत्री सतपाल महाराज, सुबोध उनियाल, प्रेमचंद अग्रवाल, गणेश जोशी अर हरिद्वार लोकसभा सीट बिटि भाजपा प्रत्याशी त्रिवेंद्र सिंह रावत, पैल्यक मुख्यमंत्री रमेश पोखरियाल निशंक बि छायीं।।