केदारनाथ विधानसभा तोक मा तेजी से करे जाला विकासा काम : मुख्यमंत्री

मुख्यमंत्री धामिन रुद्रप्रयाग जिलम स्यालसौड़ मा उर्यूं कृषि औद्योगिक अर पर्यटन विकास म्यळा म भाग ल्यायी। ऐ मौका पर मुख्यमंत्रिन 47.43 करोड़ा 18 परियोजना कु शिलान्यास अर 1.23 करोड़ रुप्यौं कु योजनौं कु लोकार्पण कायी।

ए मौका पर मुख्यमंत्रिन घोषणा कायी कि चोपताम चांदधार अर गैंठाणा बांगर मा खेल कु मैदान बण्यें जालु। स्वारी ग्वांस बिटि कार्तिक स्वामी तक 8 किलोमीटर मोटर मार्ग बण्यें जालु। अंधरेगढ़ी-तलसारी मोटर मार्गम जैचोंरा बिटि ऐटा पवननगर थापली व कमसाल मोटर मार्ग तैं मंजूरि दिये जाली। कार्तिक स्वामिम कनकचौरी म कार पार्किंग बण्यें जाली।
मुख्यमंत्री धामिन केदारनाथै जनता कु धन्यवाद कायी अर बोलि कि विधानसभा केदारनाथा जनता न जन आशा नौटियाल तैं विधानसभा भ्यजणा कु काम कायी, उन्नि प्रदेस सरकार बि केदानाथ विधानसभा तोक मा विकास कामु तैं हौरि तेजी कारली।

उन्न बोलि कि प्रदेस सरकार चारधाम जातरा तैं सर्या साल चलौंणा कोसिस करणि च। चारधाम जातरा तैं ह्यूंदा मैना मा चलौंणा वास्ता श्री ओंकारेश्वर मंदिर मा यांका घोषणा कायी। यां से जख देस-विदेसा पर्यटक आला अर यखका व्यापारियों तैं साल भर रूजगार मिललु।

मुख्यमंत्रिन बोलि कि जिमदारु तैं अपणा खुट्टौं मा खड़ा करणा वास्ता केंन्द्र अर प्रदेस सरकार लगातार कोसिस करणि च। प्रदेसा 8 लाख जिमदारु तैं किसान सम्मान निधि कु फैदा मिलणु च। वखि दूसरि तरफा जिमदारु तैं 3 लाख रुप्यौं तक कु करजा दियें जाणु च।

मुख्यमंत्रिन बोलि कि सरकार प्रदेसम उद्योग पर पर्यटन तैं अगनै बढ़ौंणा वास्ता कोसिस करणि च।

मुख्यमंत्रिन बोलि बल पारंपरिक परंपरा विरासत अर विकासा अर पछ्याणा वास्ता म्यळों तैं उर्यें जाण चैंदन।

ऐ मौका पर रुद्रप्रयागा विधायक भरत चौधरी आशा नौटियाल, जिलाध्यक्ष भाजपा महावीर सिंह पंवार, श्रीमती अमरदेई शाह अर बौत बड़ी संख्यमा लोग छायीं।