देवभूमि उत्तराखण्ड थैं भ्रष्टाचार से मुक्त बण्यें जाळु

देरादूण। मुख्यमंत्री पुष्कर सिंह धामीन आज सर्वे चौक मा आई.आर.डी.टी. सभागार मा सुशासन, पारदर्शी अर भष्ट्राचार मुक्त उत्तराखण्ड क बारा मा उर्यूं कार्यक्रम मा भाग ल्यें।

मुख्यमंत्री न ऐ मौका फर बोलि कि विजिलेंस खूंणि 2 करोड़ रुप्यों कु रिवॉल्विंग फण्ड बण्यें जाळु। उन्न बोलि कि प्रदेस मा विजिलेंस थैं औरि कटकुटु बण्यें जाळु।

मुख्यमंत्री ने बोलि कि सरकारन भ्रष्टाचार मुक्त देवभूमि कु संकल्प लियूं च। 2025 तक उत्तराखण्ड थैं भ्रष्टाचार, ब्यसन (नशा) मुक्त बणाणा खूंणि प्रदेस क सबि विभागु थैं विजिलेंस क दगड़ मा मिलिक काम करण प्वाड़ळु। उन्न बोलि बल जु ळोग ईमानदारील काम करणा छन उथैं कै से बि डरणा क जरुरत नि च।

मुख्यमंत्री न बोलि कि भ्रष्टाचार मुक्त उत्तराखण्ड खूंणि 1064 एप सुरु हूंण क बाद ऐ एप फर अबि तक 5 हजार से जादा शिकैत ऐं। उन्न बोलि जु शिकैत भ्रष्टाचार क बारा मा छन उ फर सतर्कता विभाग खलाखल (लगातार) कारवै करणु च, हमथैं यांकि बढ़ै करण चैंंद। उन्न बोलि जु शिकैत भ्रष्टाचार क बारा म नि छन अर 1064 पर आणि छन वु शिकैत मुख्यमंत्री हेल्प लैन फर भय्जें जाणि छन, जै से ळोगु क भलु ह्वै सक्यां।

मुख्यमंत्री न बोलि कि ळोगु क दिकदारि थैं खूब करणा खूंणि सरकार सरलीकरण, समाधान, निस्तारण अर संतुष्टि क भाव से काम करणि च।

ऐ मौका फर अपर मुख्य सचिव राधा रतूड़ी, डीजीपी अशोक कुमार, प्रमुख सचिव आर.के. सुधांशु, विशेष प्रमुख सचिव अभिनव कुमार, निदेशक सतर्कता अमित सिन्हा , शासन अर पुलिसाक बड़ा अधिकारी मौजूद छायीं।