देव स्थानम बोर्ड थैं खतम करणा खूंणि तीर्थ पुरोहितों न सचिवाळयम कायी प्रदर्शन

देरादूण। देवस्थानम बोर्ड थैं भंग करणा पर सरकारक घंगच्याट (टालमटोळ) क कारण रूस्यां तीर्थ पुरोहितोंन आज सचिवाळम मा प्रदर्शन कायी अर सरकार थैं खुळी चुनौती देकैकि ब्वाळ कि अगर हमरि बात नि मानी त यांकू नुकसान भुगतणा खूंणि सरकार त्यार रय्यां।

पैळि बटि तय कार्यक्रम मा आज चारधाम क तीर्थ पुरोहित गांधी पार्क मा जमा हूईं। जख बटि तीर्थ पुरोहितों न सचिवाळय कूच कायी। सचिवाळय से पैळि पुळिसळ बैरिकेटिंग लग्यें कि ऊंथैं रोक्कि द्यायी। अगने जाणा क जिद मा तीर्थ पुरोहितों क पुळिस दगड़ घपरोळ भि ह्वायीं, जैमा मा कै तीर्थ पुरोहितों का लारा भि चिंरैग्यीं। बैरिकेटिंग क कारण तीर्थ पुरोहित वखिम सड़कि मा हि बैट्ठिक धरना द्यायी अर सरकार क खिलाफ नारे बाजी कायी।

तीर्थ पुरोहितों न ब्वाळ कि एक साळ बटि देवस्थानम बोर्ड थैं खतम करणा मांग थैं लेकैकि आंदोळन करणा छौं लेकिन सरकार हमेसा घंगच्याट क राजनीति करणि च। उन्न ब्वाळ हमरि एक मांग च देवस्थानम बोर्ड थैं भंग करैकि पूरणि व्यवस्था थैं दूबरा शुरू करै ज्यां।
पुरोहितों न ब्वाळ कि हमथैं धामी सरकार क बण्यीं हाई पॉवर कमेटी पर कुईं भरोसु नि च, किलैकि हाई पॉवर कमेटी मा अध्यक्ष मनोहर कांत ध्यानी सरकारक आदिम छन।

गंगोत्री धाम क रावळ न ब्वाळ कि हम इंतजार करणा छौं, अब हम सरकारक मोर (दरवाजा) पर अय्यां छौं तब तब्बि सरकारळ हमर समणि नि आणि च। उन्न ब्वाळ कि सरकार अंहकार मा च, लेकिन सत्ता कब्बि भि धर्म से बड़ि नि हूदीं। उन्न ब्वाळ कि अब्बि बगत च सरकार धर्म क वाटा पर वापिस ऐ ज्यां, मां गंगा ऊंकी गळती थैं माफ कैरि देळीं।