बस मा प्रसव

पौड़ी। नैनीडांडा बटि कोटद्वारा आणि बस मा हि प्रसव ह्वैग्यें। पाड़ मा स्वास्थ्य सेवाओं क बदबस्त कन्नु च यु मंगलबार खूंणि समणि ऐग्यें जब एक ब्यटुळ थैं बगत मा इलाज नीं मिलि अर बस मा हि प्रसव करण प्वाड़।

जाणकारि इन्न च कि ब्यटुल थैं जब प्रसव पिड़ा ह्वै त वीथैं नौनीडांडा स्वास्थ्य केन्द्र मा लिज्यें ग्यें। जख बटि ब्यटुळ थैं कोटद्वार जाणा खूंणि ब्वलें ग्यें किलैकि ब्यटुळ कु प्रसव कु बगत निकळि ग्यें छायीं अर अस्पताळ मा अल्ट्रासाउंड क क्वीं बदबस्त नीं छायीं। इन्न मा ब्यटुळ थैं कोटद्वार जाणा खूंणि ब्वलें ग्यें।

जैका बाद ब्यटुल अर वींकु घर्वाळु नौनीडांडा बटि कोटद्वार क बस मा बैट्ठिी ग्यीं। जाणकारि च कि कोटद्वार स पैळि ब्यटुळ थैं प्रसव पिड़ा ह्वै अर ऊंकी तबियत जादा खराब ह्वैग्यें। इन्न मा बस मा बैट्ठयां औरि ब्यटुळों न बस मा हि प्रसव करौंणा कु फैसळा करी अर बस मा हि प्रसव कर्यें दें।

जैका बाद 108 एम्बुलेंस थैं बुल्यें ग्यें अर जच्चा-बच्चा थैं कोटद्वार अस्तताळ मा भर्ति कर्यें ग्यें।

ब्यटुळ क घर्वाळा न बतै कि नौनीडांडा मा अल्ट्रासाउंड क क्वीं बदबस्त नीं च। इन्न मा अल्ट्रासाउंड खूंणि 100 किलोमीटर कोटद्वार आण प्वाड़दु।