दिल्ली धमाका, सुरक्षा बन्दुबस्त फर सवाल

राजधानी नै दिल्ली कु लालकिला मा एक कारम जु धमाका ह्वे वा से सर्या देस झक ह्वेग्ये। यीं घटनम 8 लोग जान अर 24 लोग घैल ह्वेग्यीन। मेट्रो स्टेशन क गेट नम्बर एका नजीक यु बम धमाका ह्वे। मेट्रो स्टेशना यीं जगा ब्यखुनी दा बौत भीड़ छायीं। बम धमाका मा गाड़िक-गाड़िक हवा मा उड़िग्यी, लोग डौरै इन्न-फुन्न भागण लगिन।

इन्न मा सवाल च कि संवेदनशील जगा, लालकिला मेट्रो स्टेशन अर वैका इन्नु-फुन्ने सुरक्षा का बौत इंतजाम छायीं।

ब्यखुनी यीं जगा मा लोग बौत छायीं। बम धमाका बाद पुलिसन झटाझट कारवै कायी, यांका बाद बि या बात साफ नी चूंकि सुरक्षा जांच, सीसीटीवी कैमरा हूंणा बाद बि या चूक किलै ह्वे। साफ च कि हमरि सुरक्षा बन्दुबस्ता मा अबि कि कखि न कखि अबि बि द्वळण (छेद) छन।

अबि या बात साफ नीं ह्वेकि धमाका गैस सिलेंडर मा ह्वे कनुकैकि ह्वे अबि जांच चलणि च। धमाका बाद सर्या दिल्ली एनसीआर मा हाई अलर्ट घोषित ह्वेग्ये अर पड़ोसी प्रदेसु मा बि सुरक्षा बन्दुबस्त कटकुटा करे ग्येन।

वखि या आतंकी घटना च, कै योजना बणि की यु हमला करे ग्यायी त हमरि जिमेबार एजेंसी तैं बगत पर अलर्ट हूंण प्वाड़ल अर आम लोगु तैं बि जागरुक हूंण प्वाड़लु।
आज सुरक्षा-प्रोटोकॉल, सार्वजनिक जगों पर सुरक्षा बन्दुबस्त, गाड़ियों की चेकिंग अर सकि मनखि/ गाड़ी अर ऊंका काम-काज पर नजर रखे ज्यां अर जरा बि सक ह्वे त झट करवै करे जाण चैंद।

यीं घटना मा सबसे बडत्री पिड़ा बात या च कि बेकसुर लोगुकी मौत ह्वे, अर कतकै घैल ह्वेग्यींन, बम ध्माका कतकै लोगुक कुटुम्दरि की जिकुड़ि पर घौव ह्वेग्ये।

या घटना हम सब्यौं तैं चितौंणि च कि सुरक्षा सिरफ प्रदेस/ पुलिस कु काम नीं च, या हम सब्यौं की जिमेबरि बि च।
जब बि जख बि क्वीं सकि गाड़ी/ मनखि, कै फर जरा बि सक ह्वे त झट पुलिस तैं बत्यें ज्यां। यांका दगड़ि इन्नि घटनमा घैल लोगु तैं अस्पताल पौंछाणु, लोगुकि मदत करण हम सब्यौं की जिमेबरि बि च।

देसा राजधानी म डौर कु बातावरण बणौंण कतै सै नी च। देस सबि जगा सुरक्षित हूंण चैंद जख लोग बिना डौर रयां।

आज हमतैं या स्वचण चैंद कि भवेष्य मा इन्नि घटना दुबरा नीं हूयां यां का वास्ता हम क्य करणा छौ अर हम कनि त्यरि कै सकदो।