देरादूण थैं गारौं कु बोण नीं बणण दिये जालु : उपाध्यक्ष एमडीडीए

देरादूण। प्रदेस बणणा क बाद जख देरादूण मा जमीन ब्यचण वलौं की रौंस हि रौंस (मजा ही मजा) ह्वैग्ये, त दुसर तरफा देरादूणा पछ्याण हर्चीं ह्वैग्यें। देरादूण गारौं कु बोण बणिग्यंे। जख द्य्याखा तख बड़ी-बड़ी बिल्डिंग खड़ी ह्वैग्यें।

अब देरादूण थैं बचौंणा खूंणि एमडीडीए के नै उपाध्यक्ष बंशीधर तिवारी न नै सुरुआत कायी। तिवारी न जमीन ब्यचण वला भू-माफियौं तैं बोलि कि वु अब देरादूण थैं गारौं कु बोण नी बणण द्याला।

बंशीधर तिवारी न बोलि कि जु अबि तक हूंण छायीं अब कतै नी होलु। उन्न भूमाफियौं तें सलाह बि दे अर बोलि कि अब नियमु क बिना न त क्वीं प्लाटिंग कु ले आउट पास कर्यें जाळु अर न ही मकान बणाण कु नक्सा पास करें जालु।

बंशीधर तिवारी न बोलि अबि तक त खेती-पाती क जमीन मा ही बिल्डिंग बण्यें जाणि छायीं, उन्न बोलि कि इन्नि हूंण रालु त हमथैं स्वचण प्वड़ाण कि हम नाज कख पैदा करला, अर अपड़ि आण वलि पीढ़ि थैं क्या जवाब द्यूला।