देरादूण उद्योग व्यापार मण्डळन 1 जून बटि बजार ख्वळण क कायी मांग

देरादूण उद्योग व्यापार मण्डळ क पदाधिकारियों न आज मुख्यमंत्री से भेंट कायी। उन्न कोरोना काळ मा दूकानदारू थैं हूंणवळी दिक्कत अर अपणा हूंण वळा नुकसान क बारा मा मुख्यमंत्री थैं बतै। उन्न मुख्यमंत्री से मांग कायी कि बजार थैं सुबेर नौ बजि बटि व्यखुनी दा 5 बजि तक ख्वळे ज्यां।

व्यापार मंण्डळन मुख्यमंत्री थैं बतै कि डेढ़ मैना बटि सब्बि काम धंधा बंद छन, जै कारण से उथैं भारी घाटु हूंण च। उन्न मुख्यमंत्री से 1 जून बटि बजार ख्वळण क मांग कायी। उन्न ब्वाळ कि अगर सर्रया बाजार एक दगड़ नि ख्वल्यें जै सकदा त काम क हिसाब या फिर जगा क हिसाब से बाजार ख्वळण का बारा मा सोच्यें जै सकदु।

व्यापार मण्डळन मुख्यमंत्री क कोरोना काळ मा कर्या कामों क खूब बणैंई कायी। अर ब्वाळ अब प्रेदश क दसा मा सुधार हूंण च, त अब दुकानदारू क तरफ भि टक (ध्यान) लगाणक क जरूरत च।

प्रतिनिधिमण्डळ मा व्यापार मंडळ क संरक्षक अनिळ गोयळ, कार्यकारी अध्यक्ष सिद्धार्थ अग्रवाळ, सुनील मेसोन, डीडी अरोड़ा एवं दीपक गुप्ता मौजुद छायी।