देरादूण, रिस्पना अर बिंदाल नदी पर बणलु एलिवेटेड कॉरिडोर

देरादूण। मुख्यमंत्री धामिन आज सचिवालय मे एलिवेटेड कॉरिडोरा बैठक कायी अर अधिकारियों तैं निर्देश दींन कि रिस्पना अर बिंदाल मा कॉरिडोर कु काम झट सुरु करै ज्यां।

देरादूण एलिवेटड कॉरिडोर तैं एक्सप्रेस वे दगड़ जोड़िकि केन्द्र बिटि मदत लिंणा विनति अर स्टेट सेक्टर बटि काम झट सुरू करणा वास्ता मुख्यमंत्रिन अधिकारियौं तैं निर्देश दींन।

देरादूण म गाड़ियौं की संख्या बौत तेजी से बढ़णि च यख बौत जादा पर्यटक औंणा छन अर दिल्ली देहरादूण एक्सप्रेस वे बणणा बाद हौरि लोग आला इल्लै मुख्यमंत्रिन देरादूण एलिवेटेड कॉरिडोर कु काम झट करण का निर्देश दींन।
रिस्पना नदी पर 11 किलोमीटर अर बिंदाल नदी पर 15 किलोमीटर लम्बू चार लेन एलिवेटेड कॉरिडोर कु काम हूंण। यु द्विया गदनौं पर बिजली की लैन, अर सीवर लैन तैं गदना बिटि भैर हटौंणा कु काम बि हूंण। एलिवेटेउ सड़क क दगड़ि गदनौं का द्विया छाल रिटेनिंग दिवाळ अर बाढ़ सुरक्षा का काम बि हूंणिन।

मुख्यमंत्रिन सबि विभागु तैं मिलिकि काम करणा निर्देश बि दींन।
मुख्यमंत्रिन अधिकारियौं तैं बोलि कि प्रदेसम विकासा वास्ता जु बि काम हूंणा छन, वु सबि काम भ्वा मा बि दिख्येंण चैंदन। काम बगत मा पूरा हूंण चैंदन अर काम मा गुणवत्ता की साख ध्यान दियें ज्या।