कोरोना क टीका ळगौण मा तेजी ल्यांण प्वड़ळी: तीरथ सिंह रावत

देरादूण। मुख्यमंत्री तीरथ सिंह रावतन कोरोन से बचाण खूंणि प्रदेश मा टीका लगौण मा और तेजी ल्यांण खूंणि निर्देश दीं। उन्न वाळ कि हमथैं कोरेाना से म्वरण वळी की संख्या थैं कम करणा मा जादा ध्यान देंणक जरूरत च। उन्न ब्वाळ कि 18 से 44 साळ क मनखियौं थैं कोरोना टीका लगाणा काम भि जल्दी शुरू करैं जावा, या खूंणि दवै उत्तराखण्ड पौंची ग्यायी।

मुख्यमंत्री सचिवाळयम वीडियों क माध्यम से कोरोना टीकाकरण क समीक्षा बैठक करणा छायी। ऐ मौका पर उन्न ब्वाळ कि कोरोना से पीड़ित मनखि सबसे पैळि दवै लें।

मुख्यमंत्री न ब्वाळ कि हमथैं ऑक्सीजन उपयोग की सै व्यव्स्था तय करण प्वड़ळी। अर नै बणंण वळा ऑक्सीजन प्ळाट कु काम जल्दी से जल्दी करण प्वड़ळु। उन्न ब्वाळ कि ऑक्सीजन प्ळाट मा बिजली बन्द नि हूंण चैंद ।

मुख्यमंत्री सबि जिळाधिकारियों थैं ब्वाळ कि शादी ब्या मा गिनती से जादा ळोगु का शामिळ हूंण पर सकत कार्रवाही करै जावा।

मुख्यमंत्री न ब्वाळ कि जख जादा बिमारी मनखि छन वीं जगा मा जादा ध्यान दिये जावा। जै सै बिमारी थैं फैळण से रोके जावा। मुख्यमंत्री ब्वाळ कि ऐ काम मा सेना मा अपड़ि सेवा पूरी कैरि चुक्याँ ळोगु से मदत लींये जै सकद।

ऐ मौका पर मुख्य सचिव न ब्वाळ कि आण वळा दिनुमा हमथैं जतगा ऑक्सीजन चैंण च उतगा ऑक्सीजन टैंकरों क व्यवस्था करण प्वड़ळी। उन्न वळा कि कोरोना कु लगातार बदळणु रूप थैं देखिक अगनैक तैयार करण प्वड़ळी।

सचिव स्वास्थ्य अमित नेगी न ब्वाळ कि प्रदेश मा रेमडेसिविर बौत च। अब हम कोरोना क चेन त्वड़न पर काम कारण छौं। उन्न ब्वाळ कि जू भि मनखि कोरोना क टेस्ट करैकि आदीं ऊथैं झट मेडिकळ कि दियें जाणी च।

ये मौका पर सचिव पंकज पाण्डेय ळ कोरोना टीका पर जानकारी द्यायी। वीडियो कांफ्रेंसिंग मा अपर मुख्य सचिव मनीषा पंवार अर शासन क बड़ा अधिकारी, मंडलायुक्त अर जिलाधिकारी मौजूद छायी।