अपड़ों से भतरै-भितर कबसेणि कांग्रेस

प्रधानमंत्री न अपड़ा कुमौं दौरा मा पिथौरागढ़ खूंणि चार हजार करोड़ रुप्यौं कु योजनौं कु लोकापर्ण अर शिलान्यास क्य कायी कि कांग्रेस क बड़ा-बड़ा नेतौंन भाजपा क खिलाफ मोर्चा खोलि द्यायी। कांग्रेसा प्रदेश अध्यक्ष करण माहरा अर पैल्यक मुख्यमंत्री हरीश रावता दगड़ा दगड़ि सबि बड़ा नेता प्रधानमंत्री मोदी के कुमौं दौरा पर तंज करणा छन अर प्रधानमंत्री कु दौरा तैं चुनौं कु दौरा बतौंणा छन। त दुसर तरफा कांग्रेसा द्वी विधायक धारचूला विधायक हरीश धामी अर लोहाघाटा विधायक खुशाल सिंह अधिकारी न हत्थ जोड़िकि प्रधानमंत्री कु आभार बोलि। कांग्रेस विधायक हरीश धामी न बोलि कि प्रधानमंत्री कु आदि कैलाश, पार्वती कुण्ड अर जागेश्वर धाम औंण से यखक पर्यटन क्षेत्र कु विकास होलु। वखि लोहघाटा विधायक न बोलि प्रधानमंत्री न अल्मोड़ा कु मायावती आश्रम क दगड़ि हौरि तीरथ जगों का बारा मा बोलि, यां से पता चलदु कि मोदी क ज्यूं मा उत्तराखण्ड खूंणि कतगा जगा च।

कांग्रेस विधायकु कु मोदी क तारिफ क्या कायी कि प्रदेश मा एक दा दुबरा सियासी पारा गरम ह्वैग्यें। कांग्रेस द्वी विधायकौं न प्रधानमंत्री मोदी कु आदि कैलाश, गंुजी, जागेश्वर धामा दौरा क खुब तारिफ कैकि कांग्रेस तैं अपड़ा खुट्टौं तैं पिछनै करणा खूंणि मजबूर कै द्यायी। प्रधानमंत्री क बढ़ै करणा म क्वीं बुरे नीं च अर प्रधानमंत्री अर मुख्यमंत्री अच्छु काम कारला त ऊंकी बढ़ै हूंण चैंद। पर देसा राजनीति पार्टी दूसर पार्टी क बढ़ै तैं पच्यें नीं सकदा। यीं कारण च प्रदेसा मा सियायी पारा गरम च अर कांग्रेस भतरै-भितर कबसेणि च कि अब क्य कन। कांग्रेस कबलाणि च कखि दुबरा प्रदेसा मा लोकसभा चुनौ से पैलि क्वीं खेल नीं ह्वै ज्यां। किलैकि हरीश धामी पैलि बि उपचुनौं मा मुख्यमंत्री खूंणि अपड़ि सीट छ्वणन खूंणि त्यार छायीं। इल्लै यां छ्वीं बत्थ एक दा प्रदेसा मा दुबरा हूंण बैठिग्येंन कि क्या हरीश धामी अब लोकसभा 2024 से पैलि भाजपा कु झण्डा थामला?

कांग्रेसा द्वी विधायकौं न कांग्रेस कु म्वरणु बच्णूं कै याली, बस अब त यु देयख्ण बाकी च कि कांगेस हरीश धामी अर कुशाल सिंह पर क्य कारवै करद? चर्चा त इन्न बि छन कि प्रधानमंत्री छैल मा हरीश धामी अपड़ि पछ्याण (साख) तैं बचौंणा खूंणि इन्न बयान त नीं देंणा छन।

हां अबि तक इतगा च कि हरीश धामी अर कुशाल सिंह न पार्टी से अलग लैन पर चलणा छन, अब द्विया विधायकु पर कांग्रेस क्या कारवै करद यु त अबि भवैष्य क पुटगा म च, पर अबि त कांग्रेसा द्विया विधायकु न कांग्रेसा मुंडरू त कै हि याली।