कांग्रेस थैं झटका, जोत सिंह बिष्ट न छोड़ि द्यायी पार्टी

देरादूण। जोत सिंह बिष्ट न आज नै दिल्ली मा कांग्रेस कु हथ थैं छोड़िक आम आदमी पार्टी क झाडु पकड़ि याली। जोत सिंह बिष्ट अर ऊंका नौना थैं मनीष सिसौदिया न आम आदमी पार्टी के सदस्यता दिलें।

ऐ मौका फर आम आदमी पार्टी के प्रदेस अध्यक्ष दीपक बाली ने बोलि कि आम आमदी पार्टी क कुटम्दरि प्रदेस मा लगातार बढ़णि च अर अब केजरीवालाक नीतियों थैं प्रदेस क रैवासी समझणा छन। उन्न बोलि कि जोत सिंह बिष्ट को पार्टी मा आणा से पार्टी मजबूत होली अर पार्टी थैं तागत मिललि।

उन्न बोलि कि जोत सिंह बिष्ट कि प्रदेस क भले खूंणि एक अलग हि सोच च, उन्न आम आमदी पार्टी मा ऐकि अपड़ि सोच थैं बतै द्यायी। उन्न बोलि कि आम आदमी पार्टी एक अलग हि तरौं क सोच से काम करदि अर अलग तरौं से काम करण वलों कु पार्टी मा स्वागत च।

बतै दियां क जोत सिंह बिष्ट कांग्रेस प्रदेस कार्यकारणी क काम करणा क तरीकों से रूस्यां छायी जै कारण से उन्न पार्टी क सदस्यता से इस्तीफा दे द्दायी। जोत सिंह बिष्ट 2022 चुनौं मा अफ दगड़ा हूंया भितरघात क शिकैत लगातार पार्टी मा करणा छायीं। 40 साल कांग्रेस क सेवा करण बाद पार्टी मा बड़ि जिमेबारि नि मिलण अर अपड़ि शिकैत पर पार्टी त तरफ बटि कुई सुणें नि हूंण से रूस्यां जोत सिंह न कांग्रेस पार्टी थैं छोड़ि द्यायी।