महेन्द्र भट्ट क गैरसैंण फर दियां बयान फर घमाचूर, कांग्रेस प्रदेस अध्यक्ष न बोलि उन्न क्या भंगलु (भांग) पीयूं च

देरादूण। भाजपा प्रदेस अध्यक्ष महेन्द्र भट्ट क बयानक बाद कांग्रेस हमलावार ह्वैग्यायी। भाजपा प्रदेस अध्यक्ष कु यु बयान कि गैरसैंण क पिड़ा कांग्रेसा कु दिखौंवा च बस। जै थैं लेकैकि कांग्रेस प्रदेस अध्यक्ष करन माहरा न महेन्द्र भट्ट पर जम कैकि हमला कायी अर बोलि उन्न क्या भंगलु (भांग) पीयूं च।

करन माहरा न बोलि बल भाजपा प्रदेस अध्यक्ष थैं शरम आण चैंद जु बिना स्वचयां, समझि क इन्ना बयान दिंणा छन। उन्न बोलि कि गैरसैंण मा जु इमारत बणि च वै थैं बणौंण से लेकैकि गैरसैंण मा सर्या काम कांग्रेस क हि कर्यूं च।

करन माहरा न बोलि कि कांग्रेस न तम्बु मा गैरसैंण मा विधानसभा सत्र चल्यें, अर 2 साळु मा भाजपा सरकारन गैरसैंण थैं रूड़ियों कि राजधानी घोषित करणा क बाद वख सत्र नीं चल्यें। उन्न बोलि कि भाजपा क शासन मा नौनियों क दगड़ मा बलात्कार अर उंकू कतल हूंणा छन। उन्न बोलि कि भाजपा प्रदेस अध्यक्ष थैं अपड़ा भितर दय्खण चैंद।

करन माहरा न भाजपा क बड़ा नेतौं थैं बोलि कि इन्न नेतौं क गुच्चु बन्द करण चैंद, जु बिना समझिक इन्न बयान दिंणा रैन्दन। उन्न बोलि गैरसैंण मा जु भि काम हूयां छन कांग्रेसा क हि कर्या छन।