मेयर गामा क खिलाप कांग्रेस न कायी नगर निगम मा प्रदर्शन

देरादूण। कमै से जादा जैदाद जमा करणा क मामला मा आज कांग्रेसन देरादूण क मेयर सुनील उनियाल गामा क खिलाप प्रदर्शन कायी। कांग्रेसी कार्यकर्तों न मळिन बस्तियौं थैं पक्कु करणा क मांग अर नगर निगम मा सामिल नै वाडु मा टैक्स लग्यें जाणा कु विरोध कायी।

कांग्रेसी कार्यकर्ता पैळि कांग्रेस भवन मा जमा ह्वीं अर वख बटि जसविंदर गोगी क नेतृत्व मा नगर निगम पौंचि। नगर निगम मा गेट बंद हूंण पर कांग्रेसी कार्यकर्ताऔं न तागत लगे कि गेट खोलि अर भितर घूसी ग्यीं। कांग्रेसी कार्यकर्ता मेयर सुनील उनियाल गामा क खिलाप प्रदर्शन कायी अर धरना द्यायी।

महानगर अध्यक्ष गोगी न बोलि कि मेयर सुनील उनियाल गामा अर भाजपा नेतौंन अपड़ि जैदाद थैं जन बढ़ै वु तरीका वु जनता थैं बि बतै दियां। उन्न बोलि 4 साल मा ऊंकी जैदाद 10 गुणा बढ़िग्यें, यु क्वीं चमत्कार नी त क्या च।

महानगर अध्यक्ष न बोलि कि नगर निगम मा नै बण्यां 40 वार्डु खूंणि सरकारन फैसळा लै छायीं कि 10 साल तक नै वार्डु मा क्वी कर नी लिये जालु पर नगर निगम नै वार्डु मा कर लगे दे, जु गलत च।
उन्न बोलि कि ये फैसला थैं वापिस लिये ज्यां। महानगर अध्यक्ष न बोलि कि सरकारन मलिन बस्ती थैं पक्कु करणा क अर वख रैंण वळों थैं मालिकाना हक देंणा क बात बोलि छायीं। उन्न बोलि क नगर निगम हमरि यु मांग थैं जब तक नीं मानळु हमरु आन्दोलन तब तक चलणु रालु।

सूर्यकांत धस्माना न बोलि कि कांग्रेस जनता क मामलों थैं इन्नि उठाणि राळी। उन्न बोलि राजधानी देरादूण मा सड़कियों के हालत बौत खराब छन, उन्न बोलि बल देरादूण मा इन्न हलात पैळि कबि नी ह्वै जन आज च।

नगर निगम मा प्रदर्शन करण वलों मा मनीष नागपाल, गोदावरी थापली, डॉ. विजेंद्र पाल, संगीता गुप्ता, सुमित्रा ध्यानी, उपेंद्र, अर्जुन सोनकर, मुकेश सोनकर, हुकुम सिंह गढ़िया, सोनिया आनंद, अनिल रतूड़ी, अनिता, रेखा दास अर बौत सर्या कांग्रेसी छायी।