कांग्रेस नैं रंग मा त भाजपा आज भी मोदी क रंग मा हि रंगी च

उत्तराखण्ड मा चुनौ मा कुछ हि दिन बच्यां छन। 2022 चुनौ मा लडै़ अब कांग्रेस, भाजपा क बीच मा ह रैग्यायी। प्रदेस मा आम आदमी पार्टी त फ्री मा फ्री क राजनीति करणि च त यूकेडी बथौं मा उण्डनि च अर सुपिन्यों मा सुपिन्यां देय्खणि उत्तराखण्ड मा राज करणा कु प्लान बणाणि च। यूकेडी मा ब्वळण खूंणि केवळ एक हि बात च कि हमन राज्य क लडै़ लड़ि। यूकेडी मा एक भि नेता इन्न नि च कि जू अपड़ा दम पर 1000 हजार मनखियों थैं भि जमा कैरि सक्यां। दूसरी तरफ भाजपा, कांग्रेस अर आम आदमी पार्टी भीड़ तंत्रळ अपड़ि मौजदू प्रदेस मा दिखाण छन। कांग्रेस, भाजपा अर आम आदमी पार्टी क बड़ा से बड़ा नेता उत्तराखण्ड मा अपणि पार्टीकु प्रचार करणामा लग्यां छन। जख भाजपा 4 दिसम्बर खूंणि देरादूण मा प्रधानमंत्री विजय संकल्प महारैळी थैं ऐतिहासिक बतौंणि च अर सर्या उत्तराखण्ड मा 18 दिसम्बर बटि 4000 किलोमीटर क विजय संकल्प यात्रा करणा क त्यारि करणि च। जात्रा जनवरी क पैळि हफ्ता तक चळळि। ईं जात्रा मा प्रधानमंत्री नरेंद्र मोदी गृहमंत्री अमित शाह अर औरि केन्द्रीय मंत्री भि शामिळ ह्वाळा जैमा एलईडी लग्यीं मल्टीपरपज गाड़ी भाजपा क चुनौ परचार कारळा।

त दूसर तरफ 16 तारिक खूंणि देरादूण मा कांग्रेस क रैळी मा जन्न मनखियों का भीड़ छायी वै से कांग्रेस मुखड़ि मा चळक्वार ऐग्यायी। भीड़ देखिक कांग्रेस नकप्वड़ों मा सत्ता क गंध ऐग्यायी। राहुळ गांधी का भाषण का बाद प्रदेस कांग्रेस मा भि बौत उत्साह मा च। राहुळ गांधी ळ देरादूण मा अपड़ा भाषण से मोदी मैजिक थैं कम करणा क ख्ूांणि अपड़ि प पूरी ताकत लग्यें द्यायी। रैळी मा राहुळ गांधी न केवळ प्रधानमंत्री मोदी पर हि वार कायी। मोदी सरकार थैं जिमदार (किसान) विरोधी अर मोदी सरकार थैं पैसा वळों क ताकत वर सरकार बतै क तंज कायी। राहुळ गांधी न विजय सम्मान रैळी मा एक नै अंदाज मा अर नै विचार मा नजर आयीं। या मा खास बात या छायी कि कांग्रेस न तीर्थ पुराहित अर देस का ज्वानु थैं अपड़ा मंच मा सम्मान दें कैकि भाजपा थैं बताणा क कोशिश भि कायी कि हम हमरू भि देस क सेना दगड़ा मा रिश्ता च अर हमन भि देस खूंणि अपड़ों थैं बळिदान कायी। कांग्रेस भि प्रदेस मा शहीद ज्वान, पुळिस ज्वान अर शहीद राज्य आंदोळनकारियों क कुटुम्दरि थैं वीर ग्राम परिक्रमा जात्रा करैकि सम्मानि कारळी, साफ च कि कांग्रेस भि भाजपा क जन्नि अब उत्तराखण्डक फौजियांे क भरोसा पर च।

लेकिन भाजपा अर कांग्रेस क रैळी मा साफ फर्क यों च कि भाजपा आज भि मोदी अगने-पिछने रिटणिं दिख्येंणि। त दूसरी तरफ कांग्रेस क्षेत्रिय जनता क बात, किसान, बेराजगारी अर मैगईं थैं चुनौं मा मुद्दा बणाणा क त्यारि करणि च। राजधानी क नौ पर हरीश रावत साफ-साफ बतौणा छन कि उत्तराखण्डियत अर गैरसैंण हमरि पच्छ्याण च। साफ च कि राहुळ गांधी के देरादूण मा रैळी क बाद कांग्रेस एक नैं रंग मा नजर आणि च जबकि भाजपा आज भी मोदी क रंग मा हि रंगी च।