भ्रष्टाचार कु मतबल कांग्रेस : मुख्यमंत्री धामी

बागेश्वर। बागेश्वर विधानसभा सीट मा 5 सितम्बर खूंणि चुनौ च। भोळ इत्वार खूंणि चुनौ प्रचार रुकी जालु। इन्न मा सबि पार्टी चुनौ प्रचार मा खूब मेनत करणि छन अर अपड़ा-अपड़ा प्रत्याशी खूंणि बोट मंगणि छन।

आज मुख्यमंत्री धामी न बि बागेश्वर कु दौरा कायी अर भाजपा प्रत्याशी खूंणि बोट मंगिन।

मुख्यमंत्री न धामीन बोलि कि शिवजी नगरी बागेश्वर बटि पार्वती दास तैं जितौंणु जरुरी च। कत्यूरि घाटी म मन्दिर बणौंणा खूंणि भाजपा तैं जितौंणु जरूरी च। उन्न कांग्रेस फर निसाण लग्यें अर बोलि कि कांग्रेस गरीबी हटाओ कु नारा लगान्दि छायीं। देसा मा गरीबी त नीं हटि पर कांग्रेस सर्या देस बटि गैब ह्वैग्यें। उन्न बोलि भ्रष्टाचार कु मतबल कांग्रेस च। उन्न बोलि कांग्रेस तैं बोट दिंणु मतलब बिस पिणु जन्न च, इल्लै बिस न, अमृत प्यावा अर भाजपा तैं बोट द्यावा।

मुख्यमंत्रीन बोलि बागेश्वरा विकास खूंणि हमरि सरकारन तीन अरब से जादा योजना दीं। मुख्यमंत्री न बोलि विकास क कामु तैं अगनै बढ़ौंणा खूंणि बागेश्वर तोक क आस तैं पूरि करणा खूंणि अर प्रदेसा विकास तैं अगनै बढ़ौंणा खूंणि यख क जनता भाजपा तैं बोट देली।