मुख्यमंत्री धामीन उच्च शिक्षा शोध प्रोत्साहन योजना अर शोध अनुदान वितरण कु शुभारंभ कायी
देरादूण। मुख्यमंत्री धामी न आज मुख्यमंत्री सभागार मा उच्च शिक्षा क जरिया छात्र अर ज्वानु क कौशल विकास खूणि नेशनल स्टॉक एक्सचेंज गौरव योजना अर मुख्यमंत्री उच्च शिक्षा शोध प्रोत्साहन योजना अर शोध अनुदान वितरण कु शुभारंभ कायी।
मुख्यमंत्री न बोलि कि उच्च शिक्षा शोध प्रोत्साहन योजना अर शोध अनुदान वितरण क जरिया मिल्यां 500 शोध प्रस्तावु मा बिटि 44 शोध प्रस्तावु खूणि 3 करोड 66 लाख रुप्यों क शोध अनुदान राशि मंजूरि करै ग्यायी। यांकी पैलि किस्त 1 करोड़ 83 लाख रुप्या ऑन लैन जारी करै ग्यींन।
मुख्यमंत्री न बोलि कि पिछल कुछ सालु बिटि उच्च शिक्षा क गुणात्मक विकास खूणि कै योजनौं जरिया सरकारन कोसिस कायी। यीं कोसिस मा अब ”मुख्यमंत्री उच्च शिक्षा शोध प्रोत्साहन योजना“ सुरू करै ग्यायी।
मुख्यमंत्री न बोलि कि प्रधानमंत्री मोदी क नेतृत्व मा आज सर्या देस मा विकासा काम हूंणा छन। विकसित भारत खूणि यु अमृतकाल च। विकसित भारत बणौंणा 140 करोड़ देसा रैवासियौं कु संकल्प च। उन्न बोलि ग्लोबल इन्वेस्टर्स समिट मा नेशनल स्टॉक एक्सचेंज क दगड़ि हमरू करार फैदामंद होलु। मुख्यमंत्री न बोलि कि 2025 तक ये तोक मा पांच गुणा संभौवना छन।
ये मौका पर शिक्षा मंत्री डॉ. धन सिंह रावत, कृषि मंत्री गणेश जोशी, सचिव उच्च शिक्षा शैलेश बगौली, मैनेजिंग डायरेक्टर अर सीईओ एनएसई आशीष चौहान वखम छायीं।