स्मार्ट सिटी पर सियासी घमाचूर

देराूदण सैर स्मार्ट ह्वैग्यें इन्न ब्वलें जाणु च। पर स्मार्ट सिटी देरादूण क कामु पर सुरु बटि सवाल खड़ा हूंणा रै। स्मार्ट सिटी देरादूण कु काम जब बटि सुरु ह्वै, तबि बटि ही देरादूणा रैवासी हि ना बल सरकार खूंणि बि बडु मुन्डरू बण्यूं छायीं। स्मार्ट सिटी क मठु-मठु हूंणा कामु पर भाजपा क पैल्यक मुख्यमंत्री त्रिवेन्द्र सिंह रावत त विधायक खजान दास न कै बार अपणि नारजगी जतै अर कै सवाल खड़ा करिन। अब एकदा जब स्मार्ट सिटी देरादूण नै रंग म रंग्यूं दिख्येंणु च तबि धर्मपूर बटि भाजपा क विधायक चमोली स्मार्ट सिटी क कामु पर सवाल खड़ा करणा छन। चमोली स्मार्ट सिटी म देरी से हूंणा काम क सिकैत नीं करणा, बल उन्न स्मार्ट सिटी क सर्या प्राजेक्ट पर हि सवाल खड़ा करणा छन।

विनोद चमोली न साफ बोलि कि देरादूणा अन्वार तैं बदलि करणा खूंणि, जु डीपीआर बण्यंेग्ये छायीं अर जु काम बत्यें ग्यंे छायीं, वु काम भ्वां म कखि बि नीं दिख्येंणा छन। उन्न बोलि कि पलटन बजार म साइक्लिंग टैªक बणौंणा कु काम डीपीआर म छायीं पर साइक्लिंग ट्रैक कखि बि नी दिख्येंणु च। गांधी पार्क, पवेलियन अर परेड गिरौण्ड तैं एक करणा कु प्रावधान बि डीपीआर म छायीं। जैमा गांधी पार्क, पवेलियन अर परेड गिरौण्ड तैं एक कैकि चर्यां तरफा सड़क बणौंणा योजना छायीं पर वु कखि बि नी दिख्येंणि च।

परियोजना तैं बणौंणा खूंणि पैलि डीपीआर त्यार कर्यें जान्द, अर वैका हिसाब से हि काम कर्यें जान्द। डीपीआर क हिसाब से काम नी हूंण च या परियोजना मा बौत बड़ी अनियमितता अर लापरवै च। डीपीआर म सक्षम स्तर पर हि बदलाव हूंण जरूरी च। पर अगर इन्न नी ह्वै अर बिना डीपीआर म बदलाव कैकि स्मार्ट सिटी का काम हूंणा छन त या बौत बड़ी गड़बड़ि च।
यीं कारण च प्रदेस मा एकदा सियासी घमाचूर (घमासान) ह्वैग्यें। सवाल विधायक पर बि छन कि आखिर जब स्मार्ट सिटी प्रोजेक्टा काम लगभग खतम हूंण वल छन, तब स्मार्ट सिटी क कामु पर सवाल किलै? विनोद चमोली न तरफा स्मार्ट सिटी कु काम करण वला अधिकारियों पर अपड़ि नराजगी जतै, त दूसर तरफा उन्न इन्न बोलिकि कि मिथैं विभागीय मंत्री न विधानसभा म ये मामलु मा कुछ बि नी ब्वन दे अर चुप्प रैंणा खूंणि बोलि कि सरकार तैं कटघरा मा खडु कै दे। यखम स्वचण वलि बात या च बल जब स्मार्ट सिटी प्रोजेक्टा कु काम आखिर बगत म च अर जब स्मार्ट सिटी देरादूण नै रंग म रंग्यूं दिख्येंणु च, विधायक चमोली क बयान कु मतलब क्या च। साफ च कि विधायक चमोली न एक तीर सै कै जगा निसाण लग्यें दे अर अपणि हि सरकारा बरमण्ड म मुंडरू कै दे।

स्मार्ट सिटी देरादूण क रैवासियौं कु सुपिनु च, अर स्मार्ट सिटी परियोजना म क्वीं बि गड़बड़ी ह्वै अर यांका पिछनै कौच, यांकी जांच हूंण बौत जरूरी च।