उत्तराखण्ड, 6 मैना क भितर ह्वे जाला निकाय चुनौ

उत्तराखण्ड हाईकोर्ट मा आज प्रदेस मा निकाय चुनौ नीं कर्ये जाण तैं लेकैकि दायर जनहित याचिका पर आज सूणें ह्वे। सूणें मा सचिव शहरी विकास उत्तराखण्ड नितिन भदौरिया न कोर्ट तैं यु भरोसु दे कि 6 मैना भितर प्रदेसा मा निकाय चुनौ कर्ये जाला।

कोर्ट न सूणें क बाद कोर्टन सचिव क बयान तैं रिकॉर्ड अर द्विया याचिकौं पर दुबरा सूणें खूणि 16 अप्रैल तारिख तैं कायी।

आज सचिव शहरी विकास नितिन भदौरिया कोर्ट मा पेश ह्वीं अर उन्न सरकारक तरफा बटि कोर्ट म बोलि कि सरकारन चुनौ करौंणाक प्रक्रिया सुरू कै याली अर आरक्षण तय करणा खूणि एक सदस्यीय न्यायिक कमीशन कु गठन बि कै याली।

बतै दियां ये मामला मा जसपुरा रैवासी मो. अनीशन एक जनहित याचिका दायर कैकि बोलि कि नगर पालिका अर नगर निकाय कु कार्यकाल दिसम्बर मा खतम ह्वेग्ये। एक मैना हूणा बाद बि सरकार न चुनौ करणा कु अबि तक क्वीं विचार नी कायी। अर निकायु मा अपणा प्रशासक भर्ति कै दीं, जु कि संविधान क खिलाफ च। प्रदेस मा लोकसभा चुनौ अर विधानसभा चुनौ तय बगत मा हून्दन त निकाय चुनौ किलै ना? नियम यौं च कि निकाय चुनौ कु कार्यकाल खतम हूणा छः मैना पैलि हि चुना कु कार्यक्रम तय ह्वे जाण चैंद छायीं जु अबि तक नीं ह्वे।