चीला रेंज हादसा, गाड़ी बणौंण वलि कम्पनी अर डैरबरा पर मुकदमा

ऋषिकेश। चीला रेंज मा हूयां हादसा क बाद राजाजी टाइगर रिजर्व पार्क प्रशासनन ट्रायल खूणि गाड़ी देंण वलि कम्पनी अर डैरबर पर मुकदमा दर्ज करै याली। मुकदमा मा गाड़ी मा खराबी अर डैरबरा पर लापरवै से गाड़ी चलौंणा कु ठिकरु (आरोप) लग्यें ग्यायी।

लक्ष्मणझूला पुलिस न ऋषिकेश -हरद्वार चीला मा इलेक्ट्रिक गाड़ी हादसा मा राजाजी टाइगर रिजर्व पार्कका गोहरी रेंजा वन क्षेत्राधिकारी राजेन्द्र चंद्र जोशीक तहरीर पर आईपीसी क धारा 279, 338 अर 304 क जरिया गाड़ी बणौंण वलि कम्पनी अर गाड़ी चलौंण वला डरैबर पर मुकदमा दर्ज कै याली।

मामला मा अक्शा अर प्रवेग कम्पनी क प्रबंधक तैं आरोपि बण्यें ग्यायीं अर गाड़ी चलौंण वळु डरैबर अश्विनी बीजो, महाराष्ट्रा रैवासी पर मुकदमा दर्ज करै ग्यायी।

ऐ बारा मा थानाध्यक्ष न बतै कि मामला मा जांच करै जाणि च। उन्न बतै कि जब गाड़ी कु ट्रायल करै जाणु छायी तबि गाड़ी कु टैर फटिग्ये जै कारण सि गाड़ी सीधा डाळम टकरै ग्ये। जैमा 4 लोगुक मौत अर 5 लोग धैल ह्वे ग्यीं। त वखि राजाजी नेशलन पार्क चीला की वार्डन अबि बि लापता च। ऐ मामला मा अब या बात बि समणि आणि च कि गाड़ी मा जादा लोग बैठ्यां छायी, गाड़ी बौत तेज अर लापरवै से चलौंणा बात बि समणि आणि च।