7 अप्रैल खूंणि मुख्यमंत्री कु चौबट्टाखाल दौरा, 22 योजनौं कु कारला शिलान्यास

देरादूण। 7 अप्रैल खूंणि मुख्यमंत्री पुष्कर सिंह धामीन कु चौबट्टाखाल तहसील कु दौरा प्रस्तावित च। मुख्यमंत्री धामीन अपड़ा ऐ दौरा मा 22 योजनौं कु शिलान्यास कराला।

मुख्यमंत्री दौरा थैं लेकैकि जिला प्रशासन न अपणि तय्यरि सुरु कै याली। यांका बारा मा आज विभागु क अधिकारियों क दगड़ अपर जिलाधिकारी इला गिरि क अध्यक्षता मा एक समीक्षा बैठक उर्यें ग्यें। बैठक मा इला गिरि न अधिकारियौं थैं अलग-अलग जिम्मेबरि दे।

अपर जिलाधिकारी इला गिरि न लोक निर्माण विभाग अर पीएमजीएसवाई विभाग थैं कार्यक्रम कु मंच, साउंड अर एलईडी टीवी कु बन्दबस्त करणा का निर्देश दीं। जल संस्थान थैं पाणि कु बन्दबस्त , नगर पंचैत सतपुली अर जिला पंचायत थैं हेलीपैड मा साफ सफै, मोबाइल टॉयलेट अर जगा-जगौं मा चूना डळणा क आदेश दीं।

बतै दियां कि चौबट्टाखाल विधानसभा तोक मा मुख्यमंत्री धामी 22 योजनौं कु शिलान्यास, भूमिपूजन अर लोकार्पण करळा। अपर जिलाधिकारी न विभागु का अधिकारियों थैं बगत मा शिलापट्ट त्यार करणा क निर्देश दीं। कार्यक्रम मा लोक निर्माण विभाग क मंत्री सतपाल महाराज भी छायीं।