मुख्यमंत्री न बोलि, भर्ति इमत्यान की मि बि सीबीआई जांच चाणु छौ, पर . . .

देरादूण। देरादूण मा बेरोजगार नौना प्रदेस मा भर्ति इमत्यान मा खळाखळ हूंणा घपरोळु क जांच सीबीआई से करौंणा क मांग करणा छन पर सरकार या खूंणि त्यार नीं च। ऐ बार मा आज मुख्यमंत्री न बोलि कि विपक्ष चान्द कि प्रदेसा दसा (स्थिति) औरि जादा खराब हूंया। उन्न बोलि कि विपक्ष चान्द की प्रदेस मा भर्ति इमत्यान न हूंया अर पढ़ण वळा नौन्याळु कु बगत खराब हूंया। मुख्यमंत्री धामी न बोलि कि विपक्ष चान्द कि बेरोजगार ज्वान उंका दगड़ सड़कियौं मा रंया अर अपड़ि पढ़ै नी कर्यां उन्न बोलि कि विपक्ष मा अब यु हि कह एक तरीका च।

मुख्यमंत्री न बोलि कि वु भि सीबीआई जांच करणा चान्दन पर एक बार भर्ति मामळा मा सीबीआई जांच सुरु ह्वै त पांच, सात साल तक प्रदेसा मा क्वीं भि भर्ति इमत्यान नीं होळु। उन्न बोलि कि सरकार चान्द कि एकदा नै कैलेण्डर मा भर्ति ह्वै ज्यां, त वु सीबीआई जांच कराळा। मुख्यमंत्री न बोलि कि ऐ मामळा मा हाईकोर्टन पैळि हि बोलि याली कि जांच सै दिसा मा चलणि च। उन्न बेरोजगारू से बोलि कि सरकार इन्न ळोगु क बखौंणा मा नीं आण वळि जु ज्वानु तैं भड़कौंणा छन।

मुख्यमंत्री न बोलि कि जब देस मा घोटाळा की बात आंद त विपक्षी ब्वळद कि सीबीआई सरकार के हत्था कु खिळौंणा च, जु सरकारक सानियों (इशारा) न काम करदु। मुख्यमंत्री न बोलि कि अब वु सीबीआई जांच करौंणा खूंणि सड़कियौं मा छन।

मुख्यमंत्री न बोलि कि आज नकल माफिया कु दगडु करणवळा ळोग दिकदरि मा छन। मुख्यमंत्री न बोलि कि हमन यु सोचि याळी कि वाटु कतगा भि कठिण हूंया नकल माफियौं तैं कतै नीं छ्वड़ै जाळु। उन्न बोलि कि सरकार चान्द कि भवैष्य मा क्वीं भि इमत्यानु मा नकल नीं हूंण चैंद या खूंणि हि सरकार नकल विरोधि कानून ल्यायी।