मुख्यमंत्री पुष्कर सिंह धामीन अक्षय पात्रा क रस्वड़ो कु कायी उद्घाटन

देरादूण। मुख्यमंत्री पुष्कर सिंह धामीन आज सुक्वार खूंणि देरादूण सुद्धोवाला मा द हंस फाउण्डेशन अर शिक्षा विभाग क मदत से बण्यूं मिड डे मीला कु रस्वड़ो थैं सुरु कायी।

ऐ मौका फर मुख्यमंत्री न देरादूण क स्कुळु मा खाणा पौचांण वळि गाडियों थैं भि हारू झण्डा दिखें।

ऐ मौका पर मुख्यमंत्री न स्कुळक नौन्याळु क दगड़ मा बैट्ठि कि खाणु भि खै। स्कुळक नौन्याळु न मुख्यमंत्री से अपड़ा मनक सवाल भि पुच्छिं। मुख्यमंत्री न भि स्कुळक नौन्याळु क जिज्ञासा थैं पूरू कायी अर ऊंक सवाळु क जवाब दें।

मुख्यमंत्री धामीन बोलि कि उत्तराखण्ड सरकार, अक्षय पात्र फाउण्डेशन अर हंस फाउण्डेशन न कोसिसळ स्कुळक नौन्याळु थैं गुणवत्ता अर पौष्टिक खाणु देंण क सुरुवात ह्वै। उन्न बोलि कि अभि दिन मा खाणु देंण के सुरुवात 120 स्कुळु मा 15 हजार से जादा नौन्याळु खूंणि कर्यें ग्यें। आण वळ बगत मा हम 500 से जादा स्कुळ अर 35 हजार से जादा स्कुळक नौन्याळु थैं एक हि रस्वड़ो बटि खाणा कु देंणा कु बन्दबस्त (व्यवस्था) करळा। मुख्यमंत्री न बोलि कि नौन्याळ हमरू देस के भविष्य छन। नौन्याळु के जिन्दगि अर शरैळ स्वस्थ र्यां अर ऊथैं रसीलु खाणा कु मिल्यां यां खंूणि हम पूरी कोसिस करणा मा लग्यां छा।

मुख्यमंत्री धामीन बोलि कि हंस फाउण्डेशन क तरफ बटि स्वास्थ्य अर शिक्षा क तोकम मा बौत अच्छु काम कर्यें जाणु च। कोरोना काल मा प्रदेस क जरुरतमन्दु थैं हर तरौं के मदत हंस फाउण्डेशन न कायी। जै खूंणि मुख्यमंत्री न हंस फाउण्डेशन के प्रणेता श्री भोले जी महाराज अर माता मंगला जी कु आभार कायी।

मुख्यमंत्रीन बोलि कि अक्षय पात्र फाउण्डेशन न देवभूमि मा सेवा भाव क काम सुरू कै, यां खूंणि अक्षयपात्र फाण्डेशन क पदाधिकारियों थैं भि बौत बौत आभार।

शिक्षा मंत्री डॉ. धन सिंह रावत न बोलि कि अक्षय पात्र, द हंस फाउण्डेशन अर शिक्षा विभाग क मदत से बण्यूं रस्वड़ा थैं सुरु कर्यें ग्यायी। उन्न बोलि कि प्रधानमंत्री पोषण कार्यक्रम मा स्कुळक नौन्याळु थैं रसीळु अर पौष्टिक खाणा कु दियें जाळु। राज्य मा पांच लाख से जादा स्कुळक नौन्याळु थैं सरकार दिनकु खाणु कु देंणि च। डॉ. रावतन बोलि कि हंस फाण्डेशन अर अक्षय पात्र फाउंडेशन क कोसिसळ आज प्रदेस मा दूसरु एकीकृत रस्वड़ा क सुरू ह्वै। उन्न बोलि कि पैलि गदरपुर मा इन्न रस्वड़ा क सुरु ह्वैग्यें छायीं।

उर्र्यूं कार्यक्रम मा हंस फाउण्डेशन क संस्थापक भोले जी महाराज, माता मंगला जी, अक्षय पात्र फाउंडेशन क वाइस चेयरमैन चंचलापति दास, विधायक अर पैल्यक शिक्षा मंत्री अरविंद पाण्डे, विधायक सहदेव पुण्डीर, मुन्ना सिंह चौहान, सचिव आर. मीनाक्षी सुदंरम, शिक्षा महानिदेशक वंशीधर तिवारी अर शिक्षा विभाग क अधिकारी छायीं।