मुख्यमंत्री न दून विश्वविद्यालय मा उर्यूं नवप्रवेशित विद्यार्थियों क दीक्षारम्भ समारोह मा भाग ल्यायी

दून। मुख्यमंत्री धामीन आज देरादूण मा दून विश्वविद्यालय मा उर्यूं नवप्रवेशित विद्यार्थियों क दीक्षारम्भ समारोह मा भाग ल्यायी। ऐ मौका फर उन्न दून विश्वविद्यालय मा ओपन एयर थियेटर अर स्कूल ऑफ मैनेजमेंट भवन कु लोकार्पण कायी।

ऐ मौका फर मुख्यमंत्री न “Changing Paradigms in Business and Technology” अर “Innovative Management Practices” नौं क किताबु कु विमोचन कायी। मुख्यमंत्री छात्र-छात्राऔं क दगड़ मा संवाद कायी अर बोलि कि उत्तराखण्ड तैं उत्कृष्ट प्रदेसा बणौंणा खूंणि छात्र-छात्राओं क बौत बड़ी भूमिका ह्वैळी।

मुख्यमंत्री न नै छात्रु तैं शुभकामना द्यायी अर बोलि कि उच्च शिक्षा मा प्रवेश क दगड़ जिन्दगी मा एक नै सुरुवात च। उन्न बोलि कि जिन्दगि मा शिक्षा कु महत्व पुरण जमाना बटि च। उच्च शिक्षा मा प्रवेश जिन्दगि मा ज्ञान कु महत्व तैं बतौंन्दु।

मुख्यमंत्री न बोलि दून विवि मा लोक भाषा, दूद बोली अर साहित्य तैं बचौंणा खूंणि अर शोध क तोक मा काम करणा खूंणि डॉ. नित्यानन्द हिमालयी शोध अर अध्ययन केन्द्र प्रदेसा भाषा व साहित्य तैं बचौंणा मा काम करणु च।

मुख्यमंत्री न बोलि कि प्रधानमंत्री मोदी क नेतृत्व मा शिक्षा, उच्च शिक्षा क तोक मा गुणात्मक खूंणि बौत काम कर्यें जाणा छन। उन्न बोलि समाज अर राष्ट्र बणौंण क दिसा मा काम करणा खूंणि शिक्षा अर ऊंका कौशल विकास मा खास ध्यान दियें जाणु च।

ऐ मौका फर उच्च शिक्षा मंत्री डॉ. धन सिंह रावत, विधायक विनोद चमोली, कुलपति दून विश्वविद्यालय श्रीमति सुरेखा डंगवाल अर औरि गणमान्य वखम छायीं।