मुख्यमंत्रिन गंगधारा-विचारों का अविरल प्रवाह कार्यक्रम मा भाग ल्यायी
मुख्यमंत्री धामिन आज छंचर खुणि दून विश्वविद्यालय देरादूण मा उर्यूं गंगधारा-विचारों का अविरल प्रवाह कार्यक्रम मा भाग ल्यायी। ऐ मौका पर धामिन कार्यक्रम उर्यौंण वलों तैं शुभकामना द्यायी अर बोलि कि इन्ना कार्यक्रम हमरि संस्कृति अर परम्परौं तैं पोषित करणा दगड़ि समाज मा बदलौ लेकैकि औन्दन।
मुख्यमंत्रिन बोलि कि जन्नि गंगा खळाखळ बगणि च, वीं तरों हमरा विचार बि लगातार गतिमान रैंण चैंदन। विचारु कु प्रवाह हमतैं जिन्दगि मा अगनै बढ़णा वास्ता प्रेरित करदु। उन्न बोलि कि विचारु कु आदान-प्रदान सदनि हमरि परम्परा कु हिस्सा रैन। हमरा पुरणा गुरुकुलौं मा बि संवाद अर चर्चा तैं शिक्षा कु अधार मने ग्यायी।
मुख्यमंत्रिन बोलि कि ये कार्यक्रम मा भारतीय संस्कृति पर हमतैं श्रद्धेय स्वामी अवधेशानंद गिरि जी महाराज कु आशीर्वाद मिललु। यु द्वी दिन कु व्याख्यानम पलायन, शिक्षा, संस्कृति, पर्यावरणा दगड़ि हिमालय धारण क्षमता पर विचार करे जाला।
मुख्यमंत्रिन बोलि कि प्रधानमंत्री कु सुपिनु लोकल फॉर वोकल, मेक इन इंडिया, मेड इन इंडिया अर स्टार्टअप इंडिया क जरिया आत्मनिर्भर भारत कु सुपिना तैं पूरू करे जाणु च।
मुख्यमंत्रिन बोलि कि प्रदेस सरकार प्रदेसम सांस्कृतिक परम्परौं तैं अगनै बढ़ौंणा अर विकास वास्ता काम करणि च। प्रदेस सरकार दून विश्वविद्यालय मा सेंटर फॉर हिंदू स्टडीज की स्थापना करणा त्यारि करणि च। जख हिन्दू सभ्यता, दर्शन इतिहास अर सिद्धांतु पर अध्ययन अर शोध करे जाला। इकॉनमी अर इकालॉजी क समन्वय क दगड़ि प्रदेसा विकास तैं अगनै बढ़ये जाणु च। उन्न् बोलि उत्तराखण्ड इकलौतु प्रदेस च जख जीडीपी क दगड़ि जीईपी तैं बि नपणा की कोसिस करे ग्यायी।
मुख्यमंत्रिन बोलि कि सतत विकास क लक्ष्यौं क सूची मा उत्तराखण्ड सर्या देसम पैलि नम्बर पर च। प्रदेस सरकार स्टेट मिलेट, मिशन, एप्पल मिशन, नै पर्यटन नीति, नै फिलम नीति जन्नि योजना अर्थव्यवस्था तैं हौरि मजबूत करणि च।
मुख्यमंत्रिन बोलि कि उत्तराखण्ड सरकार न देस मा सबसे पैलि समान नागरिक संहिता पर काम कायी। जैथैं जनवरी 2025 तक लागू करे जालु।
मुख्यमंत्रिन बोलि कि प्रदेस सरकार न अतिक्रमणा खिलाप कारवै तेज कै याली। कटकुटु धर्मांतरण कानून, दंगारोधी कानून अर नकल विरोधी कानून भी लागू करे ग्यायी। उन्न बोलि हमन जु कारवै कायी वु कै धर्म या समुदाय खिलाप न, बल प्रदेसा सांस्कृतिक एकता अर सामाजिक सद्भाव तैं बचौंणों वास्ता कायी।
ऐ मौका पर आचार्य महामंडलेश्वर जूना अखाड़ा स्वामी अवधेशानंद गिरी जी महाराज, पैल्यक मुख्यमंत्री त्रिवेंद्र सिंह रावत, विधायक विनोद चमोली , कुलपति दून विश्वविधालय डॉ. सुरेखा डंगवाल बि छायीं।