मुख्यमंत्रिन कायी उत्तराखण्ड राज्य अतिथि गृह ‘उत्तराखण्ड निवास’ कु लोकार्पण
मुख्यमंत्रिन आज चाणकयपुरी नै दिल्ली मा उत्तराखण्ड राज्य अतिथि गृह ‘उत्तराखण्ड निवास’ कु लोकार्पण कायी। ऐ मौका पर पैलि मुख्यमंत्रिन मर्चुला बस दुर्घटनम दिवंगत हूयां लोगुक आत्माक शांन्ति अर ऊंकी कुटुम्दरि तैं दुख सैणा तागत देंणा भगवान से विनति कायी।
मुख्यमंत्रिन बोलि कि आज हम सब्यां उत्तराखण्ड राज्य अतिथि गृह उत्तराखण्ड निवासा लोकार्पण तैं अपणि आंख्यिून दय्खणा छा। उन्न बोलि उत्तराखण्ड निवासम प्रदेसा संस्कृति, लोक कला अर वास्तुकला की अंद्वार च। मुख्यमंत्रिन बोलि कि उत्तराखण्ड निवास हमरि संस्कृति तैं सर्या दुन्या मा लिजाण दगड़ि उत्तराखण्ड अर देस-दुन्या बिटि औंण वला मैमानु तैं अच्छु सुविधा देेंलु।
मुख्यमंत्रिन बोलि कि उत्तराखण्ड संस्कृति की अंद्वार ‘उत्तराखण्ड निवास’ देसा राजधानी मा हमर प्रदेेसा पछ्याण बणलु। उन्न बोलि कि उत्तराखण्ड निवासम उत्तराखण्ड कु खाण-पिणा बन्दुबस्त करे जालु।
श्री अन्न उत्पादु अर जैवि उत्पादु तैं ब्यचणा खुणि बि यख खास बन्दुबस्त करे जालु यख उत्तराखण्डा पछ्याण ट्वपला, पिछोड़ा, शॉल, जैकेट अर प्रदेसा हौरि चीजु तैं ब्यचणा कु बि बन्दुबस्त होलु।
मुख्यमंत्रिन बोलि कि 9 नवंबर खुणि हम प्रदेसा रजय जयंती बरस मा जाणा छा, इन्न मा उत्तराखण्ड निवास कु लोकार्पण उत्तराखण्ड तैं अग्वान्या प्रदेस बणौंण तरफा बढ़णा वास्ता हमतैं नै तागत द्यालु।
मुख्यमंत्रिन बोलि पिछल तीन सालु म हमन 18 हजार पांच सौ सरकरि नौकरि दी। प्रदेसम धर्मान्तरण तैं रवक्णा खुणि कानून बण्ये ग्यायी। उन्न बोलि कि आण वलु बजट सत्र मा भू-कानून बि लागू करे जालु।
ऐ मौका पर कैबिनेट मंत्री प्रेमचन्द अग्रवाल, गणेश जोशी, डॉ. धन सिंह रावत, सासंद अर पैल्यका मुख्यमंत्री त्रिवेन्द्र सिंह रावत, सांसद अजय भट्ट, राज्यसभा सांसद अर भाजपा के प्रदेश अध्यक्ष महेन्द्र भट्ट, सांसद श्रीमती माला राज्यलक्ष्मी शाह, राज्यसभा सासद डॉ. कल्पना सैनी, मुख्य सचिव श्रीमती राधा रतूड़ी बि छायीं।