मुख्यमंत्रिन ‘सौर कौथिग’ कु कायी शुभारम्भ अर बोलि कि म्यळा ऊर्जा सुरक्षा, पर्यावरण बचौंण अर प्रदेसा विकासा वास्ता भलि कोसिस च
मुख्यमंत्री धामिन आज देरादूणा रेंजर्स गिरौंड मा उत्तराखण्ड कु पैलु सोलर म्यळा ‘सौर कौथिग’ कु शुभारम्भ कायी। ऐ मौका पर मुख्यमंत्रिन सौर स्वरोजगार योजना अर सोलर हीटर योजना क लाभार्थियों तैं अनुदान राशि का चेक बि दींन। यांका दगड़ि यूपीसीएल मुख्यालय मा सौर ऊर्जा पर बणि म्यूरल आर्ट कु बि लोकार्पण कायीं।
मुख्यमंत्रिन सौर ऊर्जा जन जागरुकता वास्ता चलये जाण वलि सोलर वैन तैं बि झण्डा दिखे कि रवाना कायी। यांका जरिया सौ दिनु तक सोलर ऊर्जा क बारम लोगु तैं जाणकारी दिये जाली।
मुख्यमंत्रिन बोलि कि यु म्यळा ऊर्जा सुरक्षा, पर्यावरण संरक्षण अर प्रदेसक सतत् विकासा दिसा मा बौत भलि कोसिस च। म्यळा म सौर ऊर्जा सु जुड़ि सबि योजना, वांका फैदा अर अलग-अलग सौर ऊर्जा क उत्पादु क बारम जाणकारी मिलिल, लोग सौर ऊर्जा कु उपयोग कैकि उत्तराखण्ड तैं ऊर्जा तोक मा आत्मनिर्भर बणौंण कु काम कारला।
मुख्यमंत्रिन बोलि कि प्रधानमंत्रिन साल 2030 तक सौर ऊर्जा क जरिया 100 गीगावाट बिजली उत्पादन कु लक्ष्य धर्यूं च। दगड़ि 2070 तक देस तैं कार्बन न्यूट्रल बणौंणा कु लक्ष्य बि च।
मुख्यमंत्रिन बोलि कि प्रदेसा सबि सरकरि भवनु मा सोलर पावर प्लांट लग्यें जाणा छन। केंन्द्र अर प्रदेस सरकार द्विया मिलकैकि 70 प्रतिशत सब्सिडी दींणि च।
पी.एम. सूर्यघर योजना क जरिया सोलर पावर प्लांट लगौंण वला 11 हजार लाभार्थियों तैं 90 करोड़ से जादा अनुदान दिये ग्यायी। उन्न बोलि घर्या अर गैर घर्या उपभोक्तों वास्ता सोलर वाटर हीटर संयत्र लगौंण पर बि 30 से 50 प्रतिशत अनुदान दिये जाणु च।
मुख्यमंत्रिन बोलि कि मुख्यमंत्री सौर स्वरोजगार योजना क जरिया सोलर पावर प्लांट लगौंण वला प्रदेसा रैवासियों तैं रूजगार बि मिलणु च। नै सौर ऊर्जा नीति क जरिया साल 2027 तक आवास मा 250 मेगावाट अर कुल 2500 मेगावाट क्षमता वलु सोलर प्लांट लगौंणा कु लक्ष्य च।
ऐ मौका पर कैबिनेट मंत्री प्रेमचंद अग्रवाल, विधायक खजान दास, बृजभूषण गैरोला, श्रीमती सविता कपूर, विश्वास डाबर, पद्मभूषण डॉ अनिल प्रकाश जोशी, सचिव डॉ. आर मीनाक्षी सुंदरम, अपर सचिव श्रीमती रंजना राजगुरु, एमडी यूपीसीएल अनिल कुमार, एमडी यूजेवीएनएल संदीप सिंघल, एमडी पिटकुल पीसी ध्यानी छायीं।