मुख्यमंत्रीन कायी दिव्यांगु थैं राज्य स्तरीय दक्षता पुरस्कार से सम्मानित
देरादूण। मुख्यमंत्री धामी न विश्व दिव्यांग दिवसा कु मौका फर आज देरादूण मा समाज कल्याण विभाग कु उर्यूं कार्यक्रम मा राज्य स्तरीय दक्षता पुरस्कार समारोह मा दिव्यांगु थैं सम्मानित कै।
मुख्यमंत्री न 32 दिव्यांगु थैं प्रशस्ति पत्र, मेडल, मान पत्र अर पांच-पांच हजार रुप्या देकि सम्मानित कायी। जौमा 10 उत्कृष्ट दिव्यांग कर्मचारी, 11 दक्ष दिव्यांग खिलाड़ी, 10 अपडु काम करण वला दिव्यांग एवं 01 सेवायोजक अधिकारी सामिल छायीं।
ऐ मौका फर मुख्यमंत्री न घोषणा कायी अर बोलि कि दक्ष दिव्यांग कर्मचारियों अर अपड़ौं काम करण वला दिव्यांगु थैं राज्य स्तर पुरस्कार मा मिलण वला 5 हजार रुप्यौं थैं बढ़ै कि 8 हजार रुप्यां कर्यें जालु।
बुढ़-बुढ़यौं थैं मिलण वळि पिंसन क तरौं दिव्यांग पिंसन योजना थैं असान कैकि जैमा वु सबि दिव्यांगु थैं पिंसन मिललि जौका नौना अर नौनि 20 साल से जादा उमर क छन। दिव्यांगु थैं इमत्यान मा पास हूंणा खूंणि कम से कम अंकु मा 5 प्रतिशता क छुट दियें जाली।
मुख्यमंत्री न बोलि कि राज्य सरकार न दिव्यांगु क भलै खूंणि साल 2022-23 मा 155 करोड़ रुप्यौं रख्यां छन।
ऐ मौका फर देरादूणा क मेयर सुनील उनियाल गामा, विधायक खजान दास, भाजपा क महानगर अध्यक्ष सिद्धार्थ अग्रवाल, समाज कल्याणा क प्रमुख सचिव एन. फैनई, समाज कल्याणा क निदेशक बी.एल. फिरमाल छायीं।