मुख्यमंत्री न 17 अभ्यर्थियौं तैं दीं भर्ति पत्र

देरादूण। मुख्यमंत्री धामीन आज सचिवालय मा उच्च शिक्षा विभाग मा नौकरि खूंणि चयन हूयां नौन्याळु तैं भर्ति पतर दे।

उत्तराखण्ड अधीनस्थ सेवा चयन आयोग क जरिया उर्यां इमत्यान मा उच्च शिक्षा विभाग मा कनिष्ठ सहायका पदु पर हूयीं भर्ति मा 43 अभ्यर्थियौं न भर्ति इमत्यान पास कायी। मुख्यमंत्री न पास हूयां 17 जनौं तैं भर्ति पतर दे। हौरियौं तैं शिक्षा विभाग भर्ति पतर डाक बटि भेज्यें जाणा छन। नौकरि फर लग्यां सबि जना तैं मुख्यमंत्री न बधै दे अर बोलि कि मिथैं उमेद च भर्ति हूंया सबि उमेदवार अपड़ु काम पूरि ईमानदारी अर लगन से काराला। उन्न बोलि कि भग्वान न तुम सब्यौं तैं सेवा कु मौका दे, अर बोलि कि हमतैं या आस च कि तुम अपडु काम करण सगोर से प्रदेसा विकास मा मदत करला।

मुख्यमंत्री न बोलि कि अच्छु काम करणा खूंणि बगत पर खास ध्यान देंण प्वाड़ळु। उन्न बोलि बगता हिसाब से हमतैं अपड़ा काम करण चैन्दन।

मुख्यमंत्री न बोलि कि प्रदेस मा कटकुटु नकल विरोधि कानून लागू ह्वैग्यें। काननू लागू हूंणा बाद भर्ति इमत्यानु म अब क्वीं घपरोल नी हूंणि च। उन्न बोलि यु काननू लागू हूंण क बाद प्रदेस मा 5 लाख से जादा नौन्याळु न भर्ति इमत्यान दीं। अब जु योग्य छन ऊंकी ही नौकरि लगणि च। उन्न भर्ति इमत्यान क त्यारि करणा वला सबि नौन्यालु तैं खूब मेनत करणा खूंणि बोलि।

ऐ मौका फर अपर मुख्य सचिव श्रीमती राधा रतूड़ी, सचिव उच्च शिक्षा शैलेश बगौली, अपर सचिव डॉ. आशीष श्रीवास्तव अर उच्च शिक्षा विभागा अधिकारी छायीं।