मुख्यमंत्रीन देरादूण बटि अयोध्या तक हवै जाज चलौंणा कायी विनती

देरादूण। मुख्यमंत्री धामीन केन्द्रीय नागर विमानन मंत्री ज्योतिरादित्य सिंधिया से देरादूण बटि अयोध्या खुणि हवै सेवा चलौंणा क विनीति कायी।

ऐ बारा मा केन्द्रीय नागरिक विमानन मंत्री तें उन्न चिट्ठी लेखि अर बोलि कि अब ज्लदी हि श्री राम जलम भूमि अयोध्या म प्रभु रामा क मूर्ति विराजमान होलि।

मुख्यमंत्री न बोलि कि उत्तराखण्ड देवभूमि च अर यख देस विदेस बटि लोग तीर्थ जातरा मा औंणा रैंदन। इल्लै देवभूमि क देसा कुणा कुणा बटि औंण वला श्रद्धालुओं खूणि अयोध्या श्री राम जलम भूमि तक क्वी सीधी हवै सेवा नीं च। जै से देस भर बटि उत्तराखण्ड अयां जातरियौं तैं अयोध्या जाणा खूणि बौत मुसकिल हून्द।
यीं कठणैं कु हल खूणि रोजना एक हवै सेवा देरादूण बटि अयोध्या तक चलयें जाणु बौत जरूरी च, जै से देस अर प्रदेसा जातरियौं तैं अयोध्या जाणु सजिलु ह्वे जालु।