मुख्यमंत्री धामीन ‘वृक्षारोपण कार्यक्रम’ मा भाग ल्यायी अर डाळु लगैकि पर्यावरण तैं बचौंणा कु द्यायी रैबार

देरादूण। मुख्यमंत्री धामीन आज श्री गुरू राम राय इण्टर कॉलेज, मोथरावाला देरादूण म ‘लोकपर्व हरेला’ त्योवार पर उर्यूं ‘वृक्षारोपण कार्यक्रम’ म भाग ल्यायी। ऐ मौका पर उन्न डाळु लगै अर पर्यावरण तैं बचौंणा कु रैबार द्यायी।

मुख्यमंत्री न बोलि कि आज उत्तराखण्ड क दगड़ा-दगड़ि सर्या देस हरेला त्योवार तैं मनौंणु च। उन्न बोलि कि सनातन संस्कृति म प्रकृति तैं ब्वै (माँ) क तरौं पूजे जांद। हम कै न कै रुपम प्रकृति क पूजा करदौ, हरेला त्योवार भी प्रकृति सेवा करणा कु त्योवार च। उन्न बोलि कि अपणि धरोहर अर प्रकृति तैं बचौंणु जरुरी च। उन्न बोलि हमतैं डाळा लगौंणा दगड़ा-दगड़ि डाळौं तैं बचौंण बि प्वाड़लु।

मुख्यमंत्री न बोलि कि देरादूण सैरम म यातायात, बजार तोका कु विकास करै जाणु च। 72 हजार करोड़ रुप्यौं से बणण वलु मेंहुवाला क्लस्टर तोक म पेयजल योजना कु काम चलणु च। छै सौ करोड़ रुप्यौं से बणण वलि देहराखास, विद्याविहार, बिंदाल अर रिस्पना नदी तोक क बीच सीवर लैन अर ड्रेनेज कु काम चलणु च। 37 करोड़ रुप्यौं से बणण वलु रेस्ट कैंप अर भण्डारी बाग फ्लाई ओवर पर काम चलणु च। मुख्यमंत्रीन बोलि कि मोथरोवाला तोक म नमामि गंगे योजना क जरिया 15 एमएलडी क्षमता कु सीवर ट्रीटमेंट प्लाट कु काम चलणु च।

ऐ मौका पर हरद्वार सांसद त्रिवेंन्द्र सिंह रावतन बोलि आज हरेला कु त्योवार सर्या प्रदेश म एक कौथिग जन मन्यें जाणु च। आज समाज न ऐ त्योवार तैं मंजूर कै याली। उन्न बोलि कि हमन अपणि अर आण वलि पीढ़ि खुणि डाळा लगौंणा कु काम करण। रावतन बोलि कि बोण क आग खुणि डाळौं तैं दोष देंणु गलत च, डाळौं तैं बचौंणु हम सब्यौं क जिम्मेबरि च।

विधायक विनोद चमोली न बोलि कि आज मुख्यमंत्री धामी क नेतृत्व म चौछ्ड़ि विकास हूंण च। उन्न बोलि कि धर्मपुर विधानसभा दिक्कत अर जरुरत तैं उन्न मुख्यमंत्री तैं बतै। मुख्यमंत्री न बोलि यांकु उचित समाधान करै जालु।

ऐ कार्यक्रम म धर्मपुर विधायक विनोद चमोली, निवर्तमान सुनील उनियाल गामा, पूर्व पैल्यक कैबिनेट मंत्री दिनेश अग्रवाल, प्रदेश महामंत्री भाजपा आदित्य कोठारी, महानगर अध्यक्ष सिद्धार्थ अग्रवाल, मण्डल अध्यक्ष विनोद पुण्डीर,सौरभ थपलियाल अर हौरि जनप्रतिनिधि छायीं।