मुख्यमंत्री न कारगिल शहीदु तैं द्यायी श्रद्धांजलि

देरादूण। मुख्यमंत्री धामीन कारगिल विजय दिवस पर गांधी पार्क शहीद स्मारक म उर्यूं कार्यक्रम म कारगिल शहीदु तैं श्रद्धांजलि द्यायी। कारगिल विजय दिवस मौका पर मुख्यमंत्री न चार घोषणा करिन। प्रदेसा शहीद सैनिकों तैं मिलण वलि अनुग्रह अनुदान राशि तैं अब 10 लाख रुप्यौं से बढ़ै कि 50 लाख करै ग्यायी। शहीद सैनिकों की कुटुम्दरि तैं सरकरि नौकरि खुणि आवेदन करणा कु बगत तैं 2 साल बिटि बढ़ै की 5 साल करै ग्यायी।

मुख्यमंत्री न बोलि कि कारगिला लड़ै म मां भारती क रक्षा खुणि हमरा बीर ज्वानु न बहादुरी अर साहस कु परिचय द्यायी अर घुसपैठियों तैं भगै दे, यां से सर्या दुन्यन हमरि सेना क तागत तैं मानि। उन्न बोलि कारगिल लड़ै म अपणा देसा रक्षा खुणि वीर सैनिकु न जु बलिदान द्यायी वै तैं देस सदनि याद रखलु।

मुख्यमंत्री न बोलि कि कारगिल की या विजय गाथा, उत्तराखण्डा बीरू क बिना अद्दा च। अपणा 75 बीरू क बलिदान तैं या बीर भूमि कबि नी बिसरलि। मुख्यमंत्रीन बोलि कि हम जै संस्कृति म पल्यां बड़ा हूंया, वीं संस्कृति क म देस भक्ति सबि भक्तियों मा सबसे बड़ी भक्ति च।

मुख्यमंत्रीन बोलि कि मि बि एक फौजि कु नौनु छौ, मिन बि फौजि अर ऊंकी कुटुम्दरि क दिकदारि तैं द्यख्यूं च। उन्न बोलि कि कारगिला लड़ै क बगत अटल बिहारी वाजपेयी प्रधानमंत्री छायीं अर हमन लड़ै जीति।

मुख्यमंत्री न बोलि प्रधानमंत्री मोदीक कोसिस न आज फौज पैलि से जादा तागतबर हूंणि च। उन्न बोलि हमरि सरकार फौज तैं आधुनिक बणौंण पर जादा जोर देंणि च। मुख्यमंत्रीन बोलि कि आज सेना गोळी कु जवाब ग्वाळन (गोला) देंणि च। मुख्यमंत्रीन बोलि कि प्रदेस म अग्निबीरू तैं सरकारि नौकरि म आरक्षण दिये जाणा क कोसिस करै जाली। सैनिक कल्याण मंत्री गणेश जोशी न बोल कि देरादूण गुनियालगौं म प्रदेसा शहीदु क सैन्य धाम बणै जाणु च। जैमा प्रदेस सबि शहीदु क नौं लिखे जाला।

ऐ मौका पर सैनिक कल्याण मंत्री गणेश जोशी, कैबिनेट मंत्री प्रेमचन्द अग्रवाल, विधायक श्रीमती सविता कपूर, बृज भूषण गैरोला, सुनील उनियाल गामा न बि शहीदु तैं श्रद्धांजलि द्यायी।

“कारगिल की विजय गाथा बि उत्तराखण्डक बीरू क बिना अद्दा च। अपणा 75 वीरू क बलिदान तैं या बीर भूमि कबि नी बिसरलि। हम जै संस्कृति म पल्यां बढ़ा हूंया छा वीं संस्कृति म देस भक्ति सबि भक्तियों मा सबसे बड़ी भक्ति च।”
पुष्कर सिंह धामी, मुख्यमंत्री, उत्तराखण्ड